Ni temulung mepelaba ajanga Wrestling nung aden:The Rock

November 15, 2015: Dwayne ‘The Rock’ Johnson-i NFL toktsür wrestling nung adenba ya temulung nung mepelatetba ajanga lir, ta sapoka shiogo.
Johnson-i, pa arishi küm 23 asüdang Canadian Football League nung medendaktsüba sülen shisatsü nung kanga okronga liasü, ta Oprah indang Master Class special sentong nung ashi.
“Shisabulua temulung mepelaba mapang asen kija amai mebilemtsü ni angazük, aser ibaji kanga nüngdak. Shisa buluba ya kari dang ajangshir masü saka nisung ajaki khenbosa ajurutsü,” ta Johnson-i ashi.
Pai, “Ni iba ama shisabulua aliba mapang nisung kari danga ni anisüngzüktsü asübo koda jungla,” ta nemjema ashi.
Arishi küm 43 tain, Johnson-i, “Ni Calgary Stampeders team nungi anendaktsür ita ka shi lir külen team coach-i kü dang tanaben adentsü asoshi phone nung ashidang ni phone odang ayu aser iba mapang nung kübo-i kü dang, na adentsü südi, ta ashiba ni bilemteter,” ta ashi.
Iba mapang ni, “Ni kübo dang, ni madentsü, ni joko parnok den kecha mali, ta langzüa liasü,” ta paisa shisem.
Iba mapang nungi tenzüka pai tebu tsüngsü nung wrestling asayar ka ama akümtsü mulungtet.
Ajisüaka tebü, Rocky Johnson-i, jabaso tebilemba nung kangabo pela mebilem.
Tebü-i pa dang, “Ibai na asoshi aibelen tulutiba ka asütsü,” ta ashi saka The Rock-i, “Majungyonga kü mulungi iba ya inyakdangtsü ashir anungji ni inyaktsü,” ta langzü.
Iba sülen tebüi pa nem training agütsü tenzük aser pa WWE nung ‘The Rock’ ta tenüng jalokja kanga nüngtugu aküm.
Kasa sentong nung pai arishi küm 14 tain jala ka lir ta shisem.
Pai, “Ni tebu tajung ka kümner. Ni kü jala Simone nem ni tanur asüdang ni manguba aser magitetba ajak agütsüner. Ni la asodang kü kapu ana nung la ajunger, ni na teti anepalutsü aser na taküm ali piyong ni na amokbanger alitsü ta shia liasü,” ta ashi.