Ni tepsettsü atema party kati nisung tepsetertem ‘hire’ süogo: Mamata

Kolkata, Monupii/May 12 (Agencies): West Bengal Chief Minister, Mamata Banerjee-i, la tepsettsü atema telok kari asalentong yangludar, aser yimtenren party kati iba atemaji nisung tepsetertem contract nung ‘hire’ süogo, ta metetdaktsü.
Zee 24 Ghanta-i interview agidang West Bengal Chief Minister aser Trinamool Congress (TMC) tongti, Mamata-i, Ni tepsettsü atema asalentong yangludar ta ni metetogo. Ni tepsettsü atema yimtenren party kati nisung tepsetertem nem contract agutsüogo. Contract nung nisung tepsettsüpurtem jagi sen ‘advance’ nung agiogo, aser parnoki kü office, ozü ki aser anasa aliba tesemtem ajak ladangogo,” ta metetdaktsü.
Anogoshia lai mezüngmeshi aser la tenüng menüktsüba tensa ajurur, ta shia Mamata Banerjee-i, “Asalentong tamajung yanglurtem jagi kü taküm jenjang tama raksatsüner, iba sülen ang shi nung tepsetner,” ta metetdaktsü.
Ajisüaka laisa, “Item ama asalentong jenjang ni aiben ajuruogo aser tesüiba mapangtem nunga aiben tepsettsü merangba nungi ni tera agidang jenbua aruogo,” ta metetdaktsü.