Ni tepuokdaki aitsü tsüboa mali: Zuma

Pretoria, November 05 (Agencies): South Africa Tir, Jacob Zuma-i tepoukdak puoka alitsü metsüboba olen ka pa pusemertem dang tanü, Honibar nü metetdaktsüogo.
Zuma aser pai aniba sorkar lenirtem anema ochimashi inyakba ken o benoktsü tenzükba sülen Zuma-i tan mezüngsüa pa pusemertem den ajurutepa, tanü iba olenji metetdaktsü.
O bendangertemi Zuma, par cabinet yimsüsürtem aser sorkari ketdang asüba shishilembatsü teloktemi India nunger takar shishilembartem den shishilembadang ozüng alema ochimashi maparen inyak asü meinyak, iba osang jangjatsü atema parnok anema bushisüngdang sentong agitsü takhangba ka S Africa nung ochimashi inyakba anemer tongti tentet, Public Protector (PP)-i taoba hopta benoka lir.
S Africa nung shishilembatsü mapa takok ngua inyaktsü nükjidong nung Zuma medemertem, Gupta adianu – Ajay, Atul aser Rajesh nungeri S Africa yimsüsür nem süpokrem sen agüja, parnok mesüzükba ken o benoka lir saka Zuma aser Gupta adianutemi parnoki aibelena meinyak ta shia, parnoksasa metentsütsü osang metetdaktsüogo.
Zuma aser pai aniba yimsüsürtemi ochimashi inyakba osang yimjak nung adoktsüba sülen S Africa nübur meyirijang jenti Zuma Tir menden nungi anentsü takhangba benoka, longkak aittsü tenzükba den Zuma-i ozüng alema inyakba kuli bushitettsü akokba olen ka opposition yimsüsürtemia metetdaktsüogo.
“Ni tepuokdaki aitsü tsüboa mali kechiyong ni apartheid mapang tepuokdak aiben idanga lir,” ta Zuma-i Kwa-Zulu Natal province nung par pusemertem dang sangoktsü.
Apartheid ta ajaba temesüng nisungtemi tanak nisungtem madak yimsüsüa, parnok rishikangshiba mapang yimtenren ken o nung aitsüba sülen Zuma-i par lenisang, asür, Nelson Mandela den Robben Island nung küm 10 shi tepuodak among.
“Asen linük nung democracy yimsüsütsü yimya benshia, o lemteptsü sentong agitsü maongka joko monguteti kümogo. Asen linük nung okatsürtemi okadak ken o benoka o atsütepba ajanga dang temeten angutsütsü tensa ajurua lir saka ibaji democracy inyakyim ka masü,” ta Zuma-i shisem.
Ano külen, Zuma dak temulung malemba sentong ka taruba hopta agitsü atema parliament-ia sentong ayonga lir.
Pa anema taoba mapang temulung malemba sentong anaben tashi agidanga par African National Congress (ANC)-i pa pusemba ajanga Zuma-i jenjang tajung ngua liasü.
ANC nung tongti lenirtemi pusema nungitba ajanga arishi küm 74 tain Zuma-i 2009 küm nungi tenzüka, S Africa Tir menden benokba sülen pa anema benokba ochimashi inyakba ken o aika nung temeten ngua lir.