Ni tetsü tajung ka mesüla: Oprah Winfrey

Los Angeles, February 25 (Agencies): Talk show queen Oprah Winfrey-i la tetsü tajungka mesüla ta ashi.
Arishi küm 63 tain-i la tanur maliba atema kecha sasa mebilemer ta ashi, kechiyong la tanur chanu anepalutsü asoshi taremzük mali, ta osang ka ajanga ashi.
“Ni tanur maginür. Ni tanur asoshi tetsü tajung ka mesüla. Kü dak taremzük mali, ni azü chanubo aremzüka reprangteter saka parnokbo kera inadoker, anungji mapang tatsüka atema dang tanur alir,” ta lai kaket ka nung osangbener dang ashi
Winfrey-i la küm 14 asüdang tebur chanu ka aso, saka hopta ishika lir süadok.
La lasasa tsürapur ka asütsü asoshi maongka mesama ta belimer, kechiyong South Africa, Johannesburg nung la indang Leadership Academy boarding school nung tetsür 172 atema la tetsü ka ama lir.
“Nisungtemi ni kibong küma tanur asotsü asoshi ajungshidang, ni kibong aser tanur maliba atema mesasatsü ta meteta liasü. Ni alima nung aliba tanurtem tetsü ka amai belimer,” ta lai ashi.
“Temeim asoshi kecha aartsü mali. Tanurji nai asoba asütsü akok mesera 2,10 mesera 20 lir ajuruba asütsü akok, itemji kecha mesükshir, kechiyong temeimji ochi süra, anepalu kasa dang asütsü,” ta lai shisem.