Ni Tir aküm nungbo Nicolas Ato Kilonser shimtsü:Le Pen

Paris, April 29 (Agencies) : French Front National (FN) nungi Tir atema toktepla candidate Marine Le Pen-i, la Tir aküm nungbo tan Tir election mezüng shilem nung tsüksang, candidate, Nicolas Dupont-Aignan la indang Ato Kilonser shimtsü, ta ashi.
Arishi küm 48 tain, Le Pen-i aser Debout la France (Arise France) party lenir arishi küm 56 tain, Dupont-Aignan na külemi Paris nung osangbenertem den senden ka nung jembia liasü. April 23, 2017 nü Tir election mezüng shilem nung Dupont-Aignan-i jenjang trokbuba ngutet. Pai vote million 1.7 angu.
Osangbenertem den jembiba mapang lenir anaprongi ashiba agi, May 7, 2017 nü Le Pen-i Tir election nung takok ngua la Tir aküm nungbo Dupont-Aignan ji Le Pen atema Ato Kilonser shimtsü.
Dupont-Aignan ya tesüiba mapang right-centre party Les Republicains nung lenir liasü.
France nung aliba political party temi Le Pen’er party ya bendanger amai bilemer aser parnoki nüburtem anemer ta züngshia aliba mapang ka nung tan mezüngsüa tanga party ka den lokteper.
“Nicolas Dupont-Aignan ya kanga dang bendanga agüja inyakba nisung ka aser linük asoshi nendaka inyakba nisung ka lir. Pai pa jangratema aliba tesem toktsütsü tejangraba sayuogo, ta Le Pen-i ashi.
Southeastern suburb, Paris Commune of Yerres nung mayor, Dupont-Aignan-i pa Le Pen den meputepba shiogo. Tena tsüngda rongsenkettsüng nung mangatettep liasü ta pai ashi. Ajisüaka tena tsüngda tebilemba ka kasa lir aser ibaji France meimba lir, ta paisa ashi.
“France nunger ajaki asen linük kümzüka ayutsü asoshi longjemdi,” ta Dupont-Aignan-i ayongzük.
Linük nung telemsa, kiralongraba aser ozüng alema inyakba nokdangtsü asoshi nükjidongser inyakba party nungi toktepla Le Pen-i, ano maneni kü pusemer adoktsü, ta ashi.