Ni tongtetba ajakji kübu temoatsü ajanga lir: Akhilesh

New Delhi, January 04 (Agencies): Tanü Uttar Pradesh Chief Minister, Akhilesh Yadav-i, yimtenren nung pai tongtetba ajakji tebu, Mulayam Singh Yadav ajanga lir, aser iba atemaji pa dang pelar, ta metetdaktsü.
Tebu aser Samajwadi Party tongti, Mulayam nem tenüngsang agüja Akhilesh-i osang agency ka dang, “Kü tesayur (Mulayam)-i kü nem maongka agütsü. Ni yimtenren nung tongtetba ajakji pa temoatsü ajanga lir,” ta ashi.
Samajwadi Party nung telok ana telemsa adoker aliba mapang ka nung Akhilesh-i iba o ya jembiogo.
SP nung telok ka nung pa lenir aser telok ka nung tebu, Mulayam lenir lir, aser Uttar Pradesh nung assembly election agitsü mapang ana nung lia, iba den külemi telok ana tsüngda party tashi raktepba den party maitsü-cycle raktepba mapang ka nung Akhilesh-i iba o jembi.
Yashi Akhilesh’er teloki Election Commission ajurua, tangbo party nung tekolakji Mulayam masü saka par jabaso Akhilesh lir, anungji cycle maitsüji parnok meyong, ta metetdakja liasü.
Tanü Samajwadi Party lenirtemi party nung mepetmesü bentettsü meranga Mulayam aser Akhilesh naprong balala ajurua liasü, saka kecha telemtetba ka dangi marutet.