Ni Tripura nunger mashioktsütsü: Pradyot Manikya Debbarma

Agartala, September 24 (Agencies): Tripura nung tamarener kibong nungi Pradyot Manikya Debbarma-i Mongulbarnü Facebook nung video ka ajanga Tripura nungertem den jembi.
Tripura Pradesh Congress Committee Tir menden nungi anenba sülen pai nübortem den jembi.
Pai party nungi anenbaji AICC general secretary incharge Northeast, Luizinho Faleiro ajanga lir ta Debbarma-i ashi.
“Anogo 20 tejakdang Faleiro-i kü dang NRC petition meyipa agitsü mesüra kü dang nungi tir menden agientsü ta ashi” ta pai metetdaktsü.
Ni PCC president makümdang nungi NRC petition benok anungji kechiba parnoki ni tir inyaktsü shim ta AICC lennir Faleiro aija Debbarma-i asüngdang.
“Ni party toktsüba atema kanga nemjema bilemer saka ni nübortem tamang mashioktsütettsü aser kü tangatetba alema meinyaktettsü. Ni nisung ajak, state party unit züngsem ajak dang tatok meshir, saka ni petition agiena nübortem dang tiyazü jembir ka ama melinür” ta paisa ashi.
“Ni kanga timtemogo. Ni iba ama mapa tamajung, ochimashi, ozüng alema inyakba mapa aika nguogo. Onok politician temi kurta temesüng asemer, saka telung nungbo onok kanga menena lir, onoki tiyazü aika jembir aser ni joko yamaji meinyaknür” ta Debbarma-isa ashi.
Anogo ishika tejakdang ni AICC interim President Sonia Gandhi den onüktem lemsatep saka lai kecha meinyak, ta paisa shisem.
Luizinho Faleiro ya ochimashi aser tangatetba shitak maliba nisung ka lir. Pa ama nisungtemi Northeast nung Congress raksatsüogo.
“Faleiro nungertem Northeast-i arubaji sen aazüktsü atema dang lir. Parnoki nisung ajak jakdang CPM lutsür saka telung nungbo parnok den teka amteper. Tripura nung Congress-i küm 26 tashi sorkar akümtsü tashi mangur kechiyong party lennirtem tsüngda telongjem aser akhümtsübutep mali, ta Debbarma-isa metetdaktsü.
Faleiro-i Tripura nung lisopurtem indang khuret atema mebilemtsür. Tawa tu Tripura yimtsüng balala nungi lisopur 600 dak tema New Delhi nung CAB anema, Kokborok oshi, Forest Bill aser ADC tem tashi itdaktsütsü atema takhangba agüja lungkak aitdang pa den ajuruteptsü merang saka pai memulung, ta paisa shisem.
“Ni Sonia, Rahul aser Priyanka Gandhi nungertem meimer aser akhümtsübur saka party indang General Secretary-i kü dang ozü nübortem anema inyakang ta ashiba ni magizüker” ta Debbarma-isa metetdaktsü.
“Ni sen yong mayoktsü, ni political party kecha nunga madentsü. Taruba ita ka ni shisadangtsü aser tarutsü atema sentong atongtsü” ta paisa ashi.