Ni ya angatetner

~ I. Zulu Pongen, Mongsenbai Ward.

Ao Milen November 12 adok nung advertisement ka ‘Kathmandu’s Enigmatic Goddess’ kaket sayaba CTC 46th Thanks giving day sentong mapang Clark Theological College Principal Rev. Dr. Mar Pongen-i lapoktsü ta zülua angu, kaket ya Rev Dr. K. Danbir Rai-i züluba lir.
Iba kaket ya par Kathmandu nunger asoshibo tajung asütsüa akok, saka kü tangatetba tila kaibo ya mangateter. Hindu nungerbo tsüngrem tetsür, tebur aika lir aser par tsüngrem tetsür dang goddess ta ajaba angazüka lir. Saka asen Tsüngrembo tebur dang ta angatetdi. Kechiaser Lipok 1:26 nung Tsüngremi ashi, “Asenok mesükba nung meimchir yangludi” Meimchir tetezü ‘nisung’ ta sür Adam mezüng yanglu ajiser yagi meperi ta ajitet nung teyarir tajung ka yangludi ta sür Eve yangludi ta shia angutsü. Asenok tetezü “Tebu Techir aser Tanela Temeshi” yangi angateter asen Tsüngrembo tebur lir.
Nisungtemi putusa putu melentepa arudang meimchirtemi Tsüngrem angateta külemtsü asoshi teyarir, ainkar o bendanger aser Mosa ozüng Senai Tenem nungi bener alu. Putir aser tesayurtemi ozüng yabo kanga sapua sayua aru, saka ozüng nung zülua aliba dang benshi ashi yangi Tsüngremi aginüba tekümtet mali ta ajiteta alimai Tsüngrem den ka dang aliba Yisu, nisung kümer tasüngtet Mary ajanga aso. Saka Mary laji Tsüngrem masü, Tsüngrembo Yisu Khrista ya dang lir. Anungji Yisuji Tebur liasü. Asen khristanpur Tsüngrem tetsürbo kodanga mangutsü aser ya Laishiba nung zülua mali. Aji süaka Tsüngremji tetsür aser tebur ajak Tsüngrem lir, shibai amangdir pa kümzüktsü ta Lai nung zülua angutsü.
Kechi tamang südir süaka pei sobaliba dak amendaker libalirua amanga arur. Anungji Goddess kaket ka Rev. Dr. K. Danbir Rai-i züluba ji kechi ta süngmanger. Mesüra CTC College nung ya Hinduism Theology-a ali asü ta bilemer. Tangar limajibo tokjang saka asen lima ABAM ajanga lapokba Missionary College nungbo Hinduism Theology tesayubaji alinungbo ajibo mayutsüla masü na? ta bilemer.
Alimai mangateti süngmanga bilemer, anungji tesayur tajungtemi tangatetba ka ratettsü nungbo kanga jungla ta bilemba lemsateper. Ni ama junga mazüngba mangatetbasa aika alinungji onok nem tangatetba tajungji yakta agütsütet nungbo kanga pelatsü ta asüngdanga zülur.