Ni ya shiner

–  T. Lima Tzüwar, Ungma Impang, Artang Ward.

Temeim asen Aotsür Aor aser Naga nungertem asen Naga lima nung alir tang masü saka bendang lima tesem balala nung alir asen Aotsür Aor aser Naga nunger amangbapurtem dang ya shiner. Oda tepang agibo tamanger, saka pei mulungjang nungbo mojing tanülai jembir aser anishir jenti lir. Tama tereprangtsü nungbo san chanu, kotaki joko taor amai jembir, saka külakküpong asüküm tenük merem ngangsangatem pei tai meimpanga yur tangar arishia tai apur jenti lir. Item nisung jaki amangbapur jenti mangmangdaktsür aser ratamatadaktsür aser ashioktsür aser Nagaland yoka achir masü no.
Oda kiburibo memetet aser mejembi sür nung jembi ama, mashi sür nung shir ama aser Tsüngremi shiogo ta pei ajung asaa nütsüng nübur ashioktsüba nisungbaji tajungbosa makümtsü ta bilemang. Laishiba nung ashi ama nai nü Tsüngrem tenüng angati ka nung tetishi, anungji naji tamanger taküm ka süra tamanger taküm ka ama alitsü merangangma. Oda tepang agibo kotak lenmangi odar ama jembir saka taküm aser temulungjang nung mojing tanülai jembir aser anishir ta süra la/pa ji mojing asütsü aser asen Naga limai Hindu yimsüji aru nungbo parnoki tama amangtsü.
Temeim amangbapurtem asen Naga lima melenshitsü, yanglushitsü aser Khristan lima shitakba akümtsü asoshi Tsüngrem akhümtsübur aser ochishir yimsüsür kanga tang nüngdak asünung ni tamalen ashiba ama ABAM aser NBCC nungi nisung kar shimmer election-i yok nungbo kanga ajungtsü aser aji Tsüngrem tsüngdang kecha tai mali amai bilemer. Laishiba nunga yamai ashir, yimjung yanglurtem asoshi temoatsüba kechiyong parnoki alima süneptsütsü. Anungji asen Naga lima ajungtsü asoshi amangbapur ajaki maneni sarasadema ata lidi arungma.