Ni yima odakjang… !

 ~  Temjentenzük, Kohima.

Tanü ni Lanur ka
Kü tia reprangdangang!
Tasüngdangba aser tebilemtsü agi sünger lir-
Ni koba lenmang nung noktaka lir?
Kü sempet den apet
Ni sayuteta lir ma?
Kü tarutsü tia koda asütsü?
Kü molungjangi masemer!

Tanü ni lanur ka
Taginübaji ya lir
Ni Yima oner!
Ni yima odakjang!
Ni Yima aotsü melaangma!
Tsüngremi agütsüba sempet
Bushitetsü, renloktetsü aser ataloktetsüsa
Kü nem maongka agüjangma!

Oh! tesasatsüka!
Tanü Lanur aika
Pei tejangraba aser nükjidong masü
Saka tsürabur nükjidongang
Arishidaktsür !
Taküm nung pei Sempet aser Tejangraba
Metettsü maogka menguteti
Lanurtem jenti tagidak makai kümer lir !

Oh! ni Lanur ka,
Ni sala-a chiokang!
Tsüngrem o-i ashir
‘tanur ka koba lenmangi aotsü tila asüdang sayuang…’
Ya tanur ajak “Theology” “Doctor” mesüra “Engineer”
Züngdaktsütsü ashirba masü ta
Tanü Lanur tangatetba lir.
Süra tanur ka koba lenmangi aotsü koda sayutet ?
Tanur ka nem Tsüngremi agütsüba sempet
Tila asüdang bushitettsü
Iba nung Tsüngrem akümtsübua indaktsütsü
Ya Tsüngremi tsürabur ajak nem nungloktsüba
Tongtipangtiba mapa ka lir ta
Tanü Lanur tangatetba lir.

Tanü Lanur teyongyabaji ya lir
Tarutsü asen Naga lima nung
Pei nükjidong tongtetba Lanurtem aika adoktsü
Pei nemTsüngremi agütsüba sempet amshia
Jentipur atema temoatsü ngudakja
Takoker Khristan Lanur kaka küma
Pei sempet amshia Pa kuli sütetsüsa
Asen lima ya maongka anguba lima ka kümdakjangma.