NIA-i Indian Mujahideen (IM) kiralongrar Abdul Wahid puogo

New Delhi, May 20 (Agencies): National Investigating Agency (NIA)-i Delhi nung aliba Indira Gandhi International Airport nungi kiralongrar telok, Indian Mujahideen (IM) nung senior züngsem, Abdul Wahid Siddibapa puogo.

Siddibapa Mohaddin’er jabaso, Abdul Wahid Siddibapa ya Karnataka, Bhatkal, Maqdoom Colony nungi lir.

Pa ya India nung Indian Mujajideen tongti, Yasin Bhatkal’er kinünger lir.

India nung tesem balala amaktsü sentong yanglutsü atema Indian Mujahideen-i Abdul nüngdaka liasü. Pa Dubai nung amenoker inyaker aser India nung IM atema züngsem tasen bushiba den Dubai nungi senotsü agütsüba atema pa anema ken o benoka liasü.

Pa aputsü warrant agüja aliba den külemi pa anema Red Corner Notice agüja liasü, aser item nung ajemdaker pa puogo.

NIA ketdangsertemi ashiba agi, Abdul Wahid ya UAE nungi yokba sülen Delhi nung aliba IGI airport nung apu.

Pa anema Interpol red corner notice agüja liasü aser pai ashiba agi, 2006 July ita nung Mumbai nung bomb aika pokdakja amakba, 2008 küm Delhi nung bomb lendong agütsüba aser 2010 küm Bangalore nung aliba Chinnaswamy Stadium nung bomb lendong agütsüba nung pa densema lir ta pa nem tai tonglokja liasü.

Wahid anema India nunger agency tem ket nung aliba kulikakettem ajanga ashiba agi, India nung bomb lendongtem matalokdang Riyaz aser Iqbal Bhatkal nati banking channels aser Western Union Money Transfer ajanga sen bener yokbaji arishi küm 32 Wahid-i agizüka liasü.