NIA-i ‘Lie detector’ amshia kiralongrar Naved dak tendangtsü

New Delhi, August 17 (Agencies): Tawa apuba Pakistan nunger kiralongrar Mohammad Naved Yakub (Usman) dak lie-detector test mesüra polygraph ta ajaba amshia tendangtsü asoshi tanü New Delhi nung aliba court kati National Investigation Agency (NIA) nem temelaba agütsüogo.

Tawa Udhampur nung sepaitem amaker kiralongrar Naved ya yimtaklirtemi apu aser tanep pa Patiala House Court kati anir oa liasü.

Asüng, Mongolbar anüngdang 11:00 ako meta CGO Complex nung Javed dak polygraph test agitsü.

National Investigation Agency (NIA)-i Indian Penal Code aser Unlawful Activities (Prevention) Act & Arms Act section balala kübok Naved anema ken o benoka lir.

Kiralongrar Naved apuba sülen pai, pa Faisalabad, Pakistan nungi lir ta ashi, saka mapang shia pai osang balala agütsüba ajanga bushisüngdangertem rata-matar.

Ano külen Pakistan Foreign Office (FO) otongdar Syed Qazi Khalilullah-i, India nung kiralongraba mapaji Pakistan nunger kari inyaka lira iba kuliji agütsütsüla, ta shiogo.

Mapang shia India dang iba ama tai tongloktsüba ya anentsüla ta ashir, ta Pakistan lenir Syed-isa shisem.

Tan ita 5 nü Naved densema kiralongraratemi Jammu & Kashmir, Udhampur District nung BSF sepaitem amakdang sepai ana tepset.