NIA-i Nagaland sorkar ketdangser asem apu

Dimapur, April 26 (Agencies): Bodbarnü National Investigation Agency (NIA)-i Nagaland sorkar ketdangser asem puogo. Parnoki National Socialist Council of Nagaland-Khaplang (NSCN (K) nem official süa sorkar sen agütsüba atema tai tonglokja apu.
NIA-i apuba ketdangsertemji Social Welfare Department nung Joint Director/DDO, Land Resources Department nung Joint Director/DDO aser Land Resources Department nung UDA/Cashier inyaker.
Ozüngi nokdanga aliba NSCN (K) telok nung züngsemtemi Dimapur aser Kohima temeket nung sorkar department aser tangar dang nungi tashiyim agi sen saruba inyakyim dak sendakba nung sorkar ketdangser asem dak tai tonglokja apu.
Par asemi NSCN (K) nem sorkar sen agütsü aser iba ajanga NSCN (K)-i ozüng alema inyakba maparen nung parnoki pusemba sayur ta NIA-i tai tongloktsü.
NIA-i bushisüngdanga aodang, demand letters aser payment receipts angu aser itemji jungjunga bushitepba nung NSCN (K), NSCN (R), FGN, NNC aser tanga telungpur teloktem nem sen aika agütsüba kuli angu aser iba nung ajemdaker sorkar ketdangser asemji apu.
Bodbarnü par asemji Special NIA Court, Dimapur kati anir oa ken o benok aser okadaki par asem rongnung nisung ana police ket nung ayutsü aser ka temang manemba atema mozükidang anepalutsü temelaba agütsü.