NIA-i NDFB (S) lenir pezü anema ken o benok

New Delhi, July 22 (Agencies): Yaküm Assam, Sonitpur district nung nisung 36 tepsetba ken o ita trok dak tema bushisüngdanga aruba sülen Bodhbar nü NIA-i NDFB-S telungpur telok nung lenir pezü anema ken o benokogo.
NDFB(S) nung Assistant Organizing Secretary Sanju Bordoloi alias Sibigiri ji, Ajoy Basumatary alias B Buhum, Nitul Daimary alias D Naihab aser Bishnu Narzary alias N Berama nunger anema CBI-i ken o benokogo, ta sangdong ka ajanga NIA-i metetdaktsü.
Guwahati nung aliba special court nung ken o agütsüba nungji NIA-i par pezü anema Indian Penal Code, Arms Act aser Unlawful Activities (Prevention) Act kübok section balala nung ken o benokogo.
Yaküm December 23 nü NDFB (S) telungpurtemi Hatijuli aser Shantipur yimtaklirtem amakba sülen iba ken züluoka liasü. Sonitpur kübok yimtsüng ana nung ya Adivasi aser Santhal nüburtem lir.
Bushisüngdangba mapang NIA-i kuli aika bendentetogo, item rongnung o kuli nungi technical records tashi aser ballistic tests densema lir, ta kasa sangdong ajanga ashi.
NIA-ia maneni iba ken o bushisüngdangtsü lemtetogo, kechiyong ano NDFB(S) nung lenir tain aika mepui lir, ta parnokisa ashi.
Assam nung Sonitpur aser Kokrajhar district na nung Adivasi nüburtem amakba sülen Union Home Ministry tetuyuba nung NIA Guwahati branch-i ken o pongu züluoka liasü.
Item ken o rongnung NDFB(S) telungpur 18 anema ken o asembo benokogo.
NIA-i ashiba agi, National Democratic Front of Bodoland-S nung ‘third Batallion’ ta ajaba telok nung lenirji Basumatary liasü.
“Pa tetuyuba aser lenisüba nung December 23, 2014 nü Sonitpur nung nüburtem tepset, iba amakba nung tetsür aser tanur densema nisung 36 tepset,” ta NIA-isa shiogo.