NIA-i NSCN-K lenir kinungtsü ajatsüa akok

Kohima, Oct 26 (TYO): National Investigation Agency (NIA)-i National Socialist Council of Nagaland-Khaplang telok nung sepai tongtiba, Niki Sumi kinungtsü aser la den tangar kar dena ajatsüa akok ta angazüker. India government-i kiralongrar telok ta aija aliba telungpur telok nem senotsü teyari agütsüba maparen nung parnok ki mita ogo.
Mongolbarnü Naharbari Basti, Dimapur nung NIA-i nisung kar ki mita aodang nisung pezü ket nungi sen lakh 27.90 den mobile phone 12, laptop 3, hard disk ka aser document 33 nguteta bener ogo.
Nagaland nung NSCN-K teloki sen sarua Myanmar leni yokba osang angashia NIA purtemi parnok kiji mita bushir ta angazüker. India government-i NSCN-K sepai nung tongtiba Niki Sumi ya June 4, 2015 anogo nung sepaitem 18 tashi taküm samatsüsa amakba mapa nung tanishir liasü ta tenüng teta metetdakja lir. Pa den NSCN-K nung lenir Starson Lamkang aser ‘Major General’ Neymlang nata dena lir ta India government-i metetdakja lir.
” Tang tashi nungbo onoki shinga mapu saka Niki Sumi kinungtsü aser la den yaritepertem ajatsü,” ta NIA nung lenir kati metetdaktsü.
Linük nung intelligence agencies aikati NSCN-K purtem Nagaland aser Manipur nung senzüba kanga junga reprangdagi.
“Nisung shia ozüng alema mali, government-i NSCN-K purtem sen anguba lenmang metetnür,” ta NIA lenirisa metetdaktsü.
Tang tashi nung NIA purtemi rakzüka aliba senji tashiyim agi government tenzüker aser nübortem dang nungi saruba sen Myanmar leni NSCN-K dangi yoktsü liasü ta NIA purtemi metetdaktsü.
Taküm 2017 küm April nung Manipur state nung Senapati district kübok Karong ta ajaba tesem ka nung Assam Rifles purtemi kasa nisungtem dang nungi sen Rs 18.47 lakh apu. Iba senji Myanmar leni NSCN-K dangi yoktsüba sen liasü ta sepaitemi bilemer.
Ajisüaka, parnok nem court-i bail agütsü aser sen aser oset rakzüka aliba ajak meyipa agütsü. Ajisüaka, tesülen Home ministry nungi ozüng agütsü nungji, NIA purtemi parnok anema okadak ken o benoka lir.