NIA-i Srinagar aser Delhi nung tesem aika mita ao

New Delhi, June 03 (Agencies): Pakisan nung amenoka aliba teloktemi Kashmir nung rara adokdaktsütsü atema senotsü agütsüba dak sendakba nung NIA-i Srinagar, Delhi, aser Haryana nung tesem 23 mita aodang sen crore ka dak tema puogo, ta Honibarnü NIA-i metetdaktsü.
NIA-i Srinagar nung tesem 14, Delhi nung 8 aser Haryana nung tesem ka mita oa liasü, aser item tesem rongnung Delhi nung Ballimaran aser Chandni Chowk aser Hayrana, Sonepat nung cold storage ka densema lir, ta NIA ketdangser kati ashi.
NIA-i apuba sen nungji Srinagar nungi sen lakh 65-70 aser Delhi nungi sen lakh 35-40 lir, ta ketdangserisa ashi.
Pai ashiba agi, separatist lenir asem- Tehreek-e-Hurriyat lenir Ghazi Javed Baba, Jammu & Kashmir Liberation Front lenir Farooq Ahmed Dar (Bitta Karate) aser Hurriyat lenir, Nayeem Khan nunger ki densema Srinagar nung tesem 14 mita ao.
Sting operation video ka nung separatist lenirtemi, Ballimaran aser Chandni Chowk (Delhi) nung inyakertemi Pakistan nungi senotsü agizüker, ta metetdaktsüba sülen Delhi nunga tesem ana ya densema tesem 8 mita ao.
Khan-i, Kashmir nung rara adokdaktsütsü atema Pakistan nungi sen agizüker ta nangzük, aser iba video ji May 16 nü prokshia liasü.
Hombar aser Mongolbarnüa Delhi nung NIA-i separatist lenir asem dang asüngdangyaa liasü.
May 20 nü NIA-i tai tonglokja alir nisung 13 dang Kashmir nung school aser sorkar kiojentem rongdoktsüba dak sendakba nung asüngdangyaa liasü.
NIA ketdangsertemi ashiba agi, yaküm July ita nung India sepaitemi Hizbul Mujahideen commander, Burhan Wani tepsetba sülen Lashkar-e-Taiba aser Pakistan nung tanga teloktemi Kashmir nung rara adokdaktsütsü atema separatist lenirtem senotsü agi yaria arur.