NIA-i ULFA züngsem 2 dak tai tongloktsü

Guwahati, November 29 (Agencies): 2018 ken o ka atema National Investigation Agency (NIA)-i United Liberation Front of Asom (ULFA) züngsem ana dak tai tongloktsüogo.
Telungpur anaji Bubul Moran (Tiger Asom) aser Binanda Dahotiya (Swadesh) na lir aser tena Unlawful Activities (Prevention) Act kübok tai tongloktsü.
Yaküm November ita Tinsukia nung Bengali nunger pungu tepsetba nung tenati shilem agi ta NIA-i ashir aser NIA Special Court, Guwahati nung ken o ji benok.
Bubul Moran aser Binanda Dahotiya nati taküm May ita temai adok aser iba sülen Assam Police-i tena apu. Tenaprong ya Tinsukia nung alir.
“November 1, 2018 aonung 7:00 ako meta nisung telok ka Army sübotsü agir Bichanimukh Kherbari yimtsüngi orr nisung pungu khaset. Iba yimtsüng nung Bengali oshi jembirtem teimba ser alir” ta National Investigation Agency (NIA)-i ashi.
NIA-i iba tatalokba atema bushisüngdanga arudang ULFA züngsemtemi shilem agiba bushitet.
ULFA telungpurtemji Myanmar nungi India-i aru. Parnok Arunachal Pradesh nungi Assam kübok Sadiya atong aser idak nung jagi Bichanimukh Kherbari-i ao, ta NIA-i ashi.