NIA purtemi Nagaland govt tenzükertem 4 apu

Dimapur, Oct. 13 (TYO) : Tanü Hokolbar nü Dimapur nung National Investigation Agency purtemi Nagaland government tenzüker tongti ketdangser nisung 4 puogo. Parnok jagi terenlok mapa inyaktsü yokba sen National Socialist Council of Nagaland-Khaplang (NSCN-K) telok nem agütsü ta aija parnok apu ta angazüker.
Par pezüpronglaji ozüng tesashi Unlawful Activities (Prevention) Act, Arms Act aser Drugs and Cosmetics Act ozüngtem den ano Indian Penal Code kübok tashiyim agi sen saruba ozüng agi dena aija pua lir.
“Onoki apurtem rongnungji taoba tourism Director Purakhu Angami, Agriculture nung Additional Director, V Aza, Irrigation department nung Joint director , Hutoi Sema aser Fisheries department nung superintendent, Kekhriesatuo Tep nungertem lir. Parnok ajak ya taoba küm August ita 17 nü Home ministry nungi ozüng agütsüba dak ajemdaker apu,” ta NIA’s Deputy Superintendent of Police, Jasveer Singh-i metetdaktsü.
Parnokji Dimapur nung Special NIA court nung police ket nung agütsüogo.
Nagaland government nung tongti ketdangsertemi inyakba mapatem anema NIA teloki bushisüngdang tenzükba ya yaküm July 31 nü Assam Rifles purtemi Dimapur nung NSCN-K nung tanishir ka tenüng agi Khetoshe Sumi apuba nungi tenzüka liasü.
Khetoshe Sumi ya Kohima aser Dimapur nung par telok asoshi state government department-tem nungi sen sarutsü asoshi nungloktsüba nisung ka liasü. Pa apuba sülen pa ajanga telongpurtemi government department-tem nung sen saruba indangji NIA purtemi puteta ao ta angazüker.
India government den yimjung nung küm 14 tashi lia arur külen 2105 küm March ita nung parnoksasa yimjung mapangji anena adokba sülen nungi India o NSCN-K telok na tsükchiteper.
NSCN-K lenir Khetoshe Sumi-i nangzükba sülen, NIA purtemi taküm 2017 küm January 18 nü Nagaland government kübok department aika nung ketdangsertem mapa mita ao aser idangji department aika nung NSCN-K aser tangar telongpur telok nem state meyong sen agizüka agütsüba kuli nguteta liasü.
Naga nunger telong nung alir teloktemi government office aser private mapa inyakba ajak nung saru meshir aser itemji sarutsü atema police-tem reprangba department asoshi dena nisung yua lir. Iba saruji government mapa inyaker shia dang küm nung anguba sen nungi 25% meshir ta NIA purtemi puteta lir.
Iba timtemji dang ashi, Nagaland nung aliba Naga nungertem dangbo government-i income tax memeshir.
Center nungi nübortem nem agütsütsü yokba aser terenlok mapa inyaktsü lemzükba sen aika telongpurtem nem agütsür ta NIA purtemisa aija metetdaktsü.
Ano, tanü tanga tatalokba ka nung, sepaitemi National Democratic Front of Bodoland (NDFB)’s Songbijit faction nung inyaker ana Assam kübok Udalguri district nung puogo. Tenaji ka John Mushahary aser kaji Joram Daimary liasü ta jangjaogo. Tenaprongla ya NIA purtemi aputsü bushia liasü ta angazüker.
Police-i ashiba agi, tenaprongla ya 2014 küm December aser 2015 küm January nung Adivasi nunger nisung 76 tashi tepsetba mapa nung dena liasü.