NIA ya ‘Namo Investigation Authority’ kümogo: Congress

New Delhi, May 13 (Agencies): 2008 küm Malegaon nung bomb pokdaktsüba ken o nung Sadhvi Pragya Singh Thakur dak tai tonglokja aliba agienba atema tejashi nung Hokolbarnü Congress-i, National Investigative Agency (NIA) ya ‘Namo Investigation Authority’ kümogo aser iba agency-i BJP aser RSS den densemba lenirtem atema inyaker, ta sashia aitsü.
Congress otongdar, Randeep Surjewala-i, ABVP lenir, Sadhvi Pragya Singh Thakur aser BJP mesüra RSS den densema aliba nisungtem anema benokba ken o tem agienba ajanga linük aoksar, NIA bangdak tashi mezüngshiba aser tim mesüi amshiba yimya ya BJP sorkari inyakba lir, ta ashi.
“Modi kübok NIA ya `Namo Investigation Authority` kümogo aser parnoki ozüng alema inyakba ken o balala nung BJP, RSS den densema alir lenirtem meshimeshia kümzüker,” ta paisa ashi.
Surjewal-isa ashiba agi, Ashok Chakra award angusang, Hemant Karkare-i 2008 Malegaon bomb lendong ken o bushisüngdanga liasü aser nisung 11 apu. “Iba mapang BJP aser Shiv Sena-i Karkare dang linük ashioktsür ka ta aja.”
Pai Azmal Kasab nunger ama kiralongrar den raraa asü, aser tanübo pai kanga junga bushisüngdangbaji mamangtetba ajanga BJP-i ano maneni Karkare tepsetogo, ta paisa ashi.
Tanü NIA-i September 2008 Malegaon bomb lendong ken o indang chargesheet file asü aser tai tonglokja alir Sadhvi Pragnya Singh Thakur den nisung pezü tenüng iba ken o nungi agien.
Malegaon 2008 bomb lendong ken o nung 2009 küm Maharashtra Anti-Terrorism Squad-i Hindu Extremist- Lt. Col. Prasad Shrikant Purohit aser Sadhvi Pragya na anema ken o benok, iba sülen 2011 küm NIA-i iba ken o agizüka liasü.