Niathu Resort nung quarantine asüba aitsür

Kohima, March 24 (TYO): Nagaland sorkari novel Corona virus keta lir ta temulung melemi bilemertem ayutsü atema ‘private resorts’ shimba aitsür ta opposition Naga People’s Front (NPF)-i tanü metetdaktsü.
Nagaland Chief Minister Neiphiu Rio-i Dimapur nung quarantine asütsü atema Niathu Resort aser Cricket Academy shimba osang metetdakja liasü.
Sorkar indang facility aika lir anungji sorkari tamasa itemji amshitsüla aser meperi nung ang nija services amshitsüla, ta NPF-i ashi.
Nija resorts nung amongba atema sen aika agir aser iba atema sorkar senpong nungi sen aika endoktsü. Anungji tamasa sorkar ket nung facility amshitsüla, ta parnokisa shisem.
“Tang ya politics inyaktsüba mapang masü ta onoki angateta lir saka kasa mapang nung business meinyaktsüla” ta NPF-isa metetdaktsü.
NPF-isa COVID tendangtsü atema testing laboratory lapoktsü atema state sorkar dang ashi aser Nagaland nungi pilaa orr aliba railway stations aser airports nung anendaka aliba Naga nunger anir arutsü atema mapa inyaktsü mepishi.
COVID-19 wara adokba sülen yimti balala nung Naga nunger bendanga amshiba tatalokbatem atema NPF-isa state sorkar dang Centre den jembitsü ayongzük.
Nagaland nung alir ajak den külemi noktaker aser asenok longjemer COVID-19 khuret madak takok angutsü. Asenoki petsaprong mesüli saka kümküma lidi aser temang merüka ayutsü merangdi, ta NPF-isa metetdaktsü.
NPF-i COVID-19 indang temetettsü prokshitsü atema state nung oshi 16 den Hindi oshi nung pamphlets adoker prokshitsü, ta parnokisa ashi.
NPF MLA temi pamphlets lakh 1 menüngtsü atema sen tenla aser itemji English oshi mangatetba yimtsüngtem nung alemtsü, ta parnokisa metetdaktsü.
State sorkarisa anogoshi aayangertemi iba tensa süitsü atema mapa kar inyaktsütsüla, ta NPF-isa ashi.