Nick Kyrgios nem hopta 16 tenokdangba agütsü

Paris, Rongjui/September 26 (Agencies): Brehostibarnü ATP-i Australia nunger tennis asayar Nick Kyrgios hopta 16 atema tenokdangba agütsüogo aser ita trok probation nung toktsüogo. Küm tsüngda court nung yimya yimpong tamajung benshiba atema pa nem iba temerenshi agütsü.
ATP-i tetuyuba agütsüba nung Kyrgios-i manidakba ajak asadanger tang iba telemtetba agiogo, kong pa dang off-season mapang behavioural management nung mongin ka teyari agitsü asoshi tuyuba densema lir.
“Probationary period ita trok sülen tenokdangba agintsü aser ajia pai tetuyuba ajaka sülen anidak nungang agintsü,” ta ATP-i ashi..
Taoba ita Cincinnati Masters asayaba mapang tanabuba round nung Kyrgios-i yimya shidak mebenshiba sülen Tour organizers-i ken o bushitsüngdang tenzük.
Russia nunger Karen Khachanov den asayaba mapang pai ball abuse asüba, court nungi temelaba magi tuguba aser o mekümdangi jembiba atema senchi USD 113,000 bo chitokogo.
“Ken o bushitsüngdangba sülen Kyrgios-i ita 12 tsüngda ketdangser aser asaya reprangertem dang o tamajung shia aruba ngutetogo aser iba ya ATP rule book anema lir,” ta ATP-isa ashi.
Tang tenokdangba agütsür aliba atema temepishiba benoktsü Kyrgios nem anogo pongu agütsüogo.
Ajisüaka US Open mapang pai ATP ya ochi mashi ta ashiba nungibo jenbuogo.
“Asayari ken o jangjashitsüba sülen iba ya aibelen tulu ka masü ta jangjaogo anungji talila temerenshi magütsütsü,” ta ATP-isa ashi.