NIDC Ltd nung nisung shimokba agientsüla : ACAUT

Dimapur, February 21 (TYO) : Nagaland sorkar mapa nung nisung aniokba maparen nung tashi alia amshiba aser tim mesüi inyakba manener, ta Media Cell, ACAUT Nagaland-i sangdong ka nung metetdaktsüogo.
NIDC Ltd, (Govt. of Nagaland undertaking) nung RTI ka benokba ajanga ‘recruitment’ teinyaktsütem alema Deputy Manager 2, Asst. Manager 2, Junior Asst-cum-Computer Asst 4, Accounts Assist-cum-Computer Assistant 1, Steno 1 aser peon 1 shimokba osang nguogo, ta Media Cell sangdong nungsa shia lir.
“NIDC-i RTI telangzüba agütsüba nung, item mapa asoshi osangkakettem nung advertisement kecha magütsü ta shia lir. Anungji, kodaser candidate temi advertisement magütsü sernung mapa atema tenüng agütsü ta tasüngdangba arur. Ano, interview magii süra, kodaser candidate tem mapa atema shimok?” ta ACAUT-i asüngdang.
Iba ya ‘backdoor appointment’ indang inyakyim lir aser ketdangsertemi kinunger mesüra metettepa alir jak achir mapa agütsüba ka dang lir. NIDC nung nisung shimokbaji ozüng alema inyakba lir aser talisa in-service employees jenjang ajungkettsü nunga timtem ajurutsü. Anungji, temalen shia aliba mapatem nung nisung shimoka aliba agienang ta ACAUT-isa takhangba agütsü.
ACAUT Nagaland atema ‘backdoor appointment’ onük metembang aser maneni iba atema inyaktsü, ta Media Cell sangdong nungsa metetdaktsüogo.