NIELIT Extension Centre nung Capacity Building training agi

Metsüremi 26, 2018 nü NIELIT Chuchuyimlang nung sorkar mapa inyakertem atema IT & Digital Services training agiba mapang tangokba noksa nung angur. 

Chuchuyimlang, Metsüremi 26 (TYO): Metsüremi 26, 2018 nü NIELIT Extension Centre, Chuchuyimlang nung Ministry of DONER-i sponser süa ‘Capacity Building of Government Employees in IT & Digital Services’ training tenzükogo.
Iba sentong nung o tatsüka jembidang Chairman, VEC, Chuchuyimlang, Pangjunglemba-i, Institute-i sorkar mapa inyakertem atema iba ama capacity building programs katsüba atema pelaba lemsatepa liasü.
Paisa training agirtem dang, angazüka pei sempet arangshitsü atema Centre nung aliba facilities amshitsü ajungshi.
Jt. Director aser iba Centre nung Officer In-charge, Daniel Meren-i technology nung tangar den liromedema alitsü nüngdak, ta metetdaktsü.
India melenshia digital society ka kümdaktsütsü nükjidong nung Northeast nung aliba state 8 nung DONER Ministry-i sorkar mapa inyaker 50,000 nem training agutsütsü; yimtsüngtem nung sorkar mapa inyakertem nem iba ama capacity building training agutsü nungang iba nükjidongji ataloktsü, ta paisa metetdaktsü.
Paisa training agirtem dang maongka ajak agia külem tenzükertem aser medemertem den angazükatepa shisatsü lemsateptsü ajungshia liasü.
Chuchuyimlang Town Baptist Arogo nung Associate Pastor Women, Wt. Katinaro-i sarasadema iba training tenzüka liasü.