NIELIT nung IT aser Digital service training tenzükogo

Kohima, Metsüremi (March) 20 (TYO): Nagaland nung sorkar ketdangsertem atema Metsüremi 20, 2018 nü NIELIT Kohima, Auditorium nung ‘Capacity Building in IT & Digital Services (Digital payments & GST densema)” training mezüngbuba batch tenzükogo, aser iba sentong nung tongti tesemdangerji IGP, Sandeep M. Tamgadge, IPS liasü.
Küm 10 tejaklen den tanü Information Technology medemdanga Sandeep-i, “Tesüiba küm ter tsüngda IT kanga melenshiogo, joko tangbo ni temelung nung rizünga ayutsü menüngdaker, kechiyong kü ket nung aliba smartphone-i ajak bilemtettsür,” ta ashi.
Paisa IT ajanga Tata Sky recharge sütetba aser restaurants mekazüka yutetba tatishitsü shisem.
Tamgadge-i, küm 20 tejaklenbo, IT ajanga sorkar mapa tesadang kabo samatsü ta bilema liasü, saka yamaji masü ta asenoki jangjaogo, ta ashi.
Service tajungtiba agütsütettsü atema asenoki IT tools amshi ashitsüla, ta paisa ashi.
Iba training agutsüba nükjidong dak sendakba nung Tamgadge-i, public, sorkar aser maparen ajak IT agi kongshiogo aser sorkar inyakyim ajak IT ajanga inyaker, tanem-tanemi IT ajanga asen libaliro azüokdar, ta ashi. “Tang nungi tenzüka küm pongu sülenbo biometrics ajanga libalirotsü aser doctor temi ibaji ajanga tashidak putettsütsü. Iba denji kasa e-Governance agi online application ajanga ajak inyaktettsü,” ta pai ashi.
Okila jembidang Director NIELIT Kohima, Er. Lanuwabang-i 2003 küm October ita nung NIELIT tenzüka mapa aser project balala inyakba metetdaktsü.
“Nüburtem tajungtiba agi tenzüktsü atema mezüngbuba nung sorkar mapa inyakertem nem tashi agutsütsü nüngdak. Nai IT amshi meshira nai komaser sensotem tenzüktettsü,” ta paisa ashi.
Tamgadge-i, küm asem tsüngda Northeast nung aliba state 8 kübok sorkar mapa inyaker nisung 50,000 nem training agutsütsü atema Ministry of DoNER-i NIELIT nem mapa lemzüktsüogo, ta metetdaktsü.
Training nungsa office mapa basics, digital payment aser GST densema tesayuba agutsütsü.
Anogo 14 tashi iba training agitsü aser anogoshia ghonda 7 training agitsü.
Iba programme ya Ministry of DoNER, Government of India-i sponsor asü aser tanü sentong nung training agirtem nem training kits agüja liasü.
Training tenzükba sentong ya Abino Mor leniba nung agi aser Deputy Director NIELIT, Er. Morimenba Amer-i tepela anküp o jembia liasü.