Niger nung alirtemi pei talidak toktsütsüsa akümer: UNHCR

Geneva, June 08 (Agencies): Nigeria nung tentetba Boko Haram kiralongrar teloki lendong kanga sashia atalokdaktsütsü tenzükba ajanga kidangsüa aliba Niger nübur meyirijang jenti par talidak toktsür tanga tesem nung jenoka alitsütsüsa akümba osang ka United Nations High Commissioner for Refugees (UNHCR)-i tanü, Bodbar nü metetdaktsüogo.

Boko Haram teloki Niger kübok Bosso nung taoba Hokolbar aser Deobar nü aser tan Hombar nü lendong kanga sashia atalokdaktsüba sülen nisung 50,000 shi lendong kanga sashia atalokdak, Diffa region toktsütsüsa akümba osang bushitet ta par tenteti ashi.

“Bosso toktsütsüsa akümertemi anülulentip tsütsüleni kilometer 30 shi pilar, Toumour jila nung jenokba osang jangjaogo,” ta UNCHR otongdar, Adrian Edwards-ia metetdaktsü.

Boko Haram teloki Nigeria arrtsü adena Niger nunga yaküm, 2015 küm February ita nungi tenzüka lendong atalokdaktsütsü tenzükba sülen UNHCR ketdangsertemi Bosso nung par maparen meinyakteti akümba aser Diffa region nung tensa kangasa mejungi akümba osang ka Edwards-isa metetdaktsü.

Iba mapang nungi tenzüka tanü tashi nung Nigeria nunger refugee nisung 80,000 densema, Diffa region nung alir nisung 240,000 shi pei talidak toktsütsüsa küma timtem toushi jenti ajuruba osang bushiteta lir.

Ajisüaka, tang pei talidak toktsür tanga tesem nung jenoka alirtem indang taküm jenjang tajungba kümdaktsütsü asoshi UNHCR-i Nigeria aser Niger sorkar den aroki lungjemer nungdakba maparen inyaktsü tenzükba osang ka Edwards-isa metetdaktsüogo.