Nigeria army-i UNICEF nem tenokdangba agütsür aliba agin

Abuja, Luchii/December 15 (Agencies): Boko Haram pur atema itangiter mapa inyaker ta United Nations agency staff tem aitsüba sülen ghonda ishika lir Nigeria military-i par linük northeast len UNICEF nem tenokdangba agütsür aliba aginogo.
Rogonü Nigerian military-i ashiba agi, UNICEF puri sepaitem inyakyim ajanga human rights tsütsü aibelenba indang metetdakja telungpur anema inyakba maparen raksatsütsü asoshi nisungtem nem tangazükba balala agütsür.
Nigeria kübok northeast tesem nung küm 10 dak tema Boko Haram aser parnok dak sendaka aliba telok temi timtem agüja arudar.
Tang tashi nung nisung 30,000 dak tema tepsetogo aser nisung aika parnok ki nungi mindokogo. Nisung million aika pei ki toktsür jenshiba sülen parnok bendanglen nungi teyari balala dak metaloker lidar.
Nigerian military sangdong ka ajanga sahiba agi, UNICEF staff temi itangitertem aniteta yoker, shirnoki telungpurtem pusemer.
Parnokisa northeast nung UNICEF inyakyim nokdangba metetdaktsü saka ghonda ishika lir military-i, parnoki Rogonü UNICEF den jungdak senden ka menogo, ta sangdonga liasü.
“Security agency tem den teka amteper tesunep nung inyaktsü atema ken o kanga junga asadangba sülen, Theatre Command-i UNICEF nem tenokdangba agüja aliba ita asem agintsü asoshi metetdakja liasü.
Military-isa ashiba agi, parnoki UNICEF tenüng nung shilem agirtem dang theatre nung staff tasentem training agiba aser shimba mapang iba dak sendaka aliba ketdangsertem den osang balala lemsateptsü asoshi mepeshia liasü.
UNICEF nem tenokdangba agütsüba aser iba tenokdangba aginba sülen UNICEF otongdar-i ashiba agi, parnoki osangtem asadangdar.
Rongchii/April nung Nigeria military-i UNICEF kübok inyaker asem aitsü. Parnoki northeast nung sepaitemi tanurtem tashiyim agi amshiba indang osang proka liasü, ta iba ken o jangjaa aliba nisung kari Reuters news agency dang ashi.