Nigeria ‘displacement camps’ nung Khristantem bendanga amshir

March 24, 2017 (Agencies) : Nigeria nung Boko Haram kiralongrar teloktemi ozüng alema mapa inyakba ajanga Khristantem pei talidak toktsür ‘displacement camp’ balala nung jenoka lir saka parnok achiajem peria mongui timtemer ta Open Doors USA ajanga metetdaktsüogo.
Küm 8 tejakdang nungi Boko Haram-i Nigeria linük nung kiralongra mapa inyaka aruba ajanga nisung million 2 shi ka pei talidak toktsür jenogo. Nigeria nung nisung million 1.8 shi achiajemtsü mongui timtemer, ta parnokisa ashi.
Linük tesem balala nung displacement camps aika lapoka lir aser teimbaka nung Khristantem bendanga amshir aser kar nungbo chiyungtsü aser teyaritemji Khristantem atema masü ta ashiba osang lir, ta Open Doors ajanga metetdaktsü.
2014 aser 2015 nung Khristantem pei talidak toktsür aotsüsa tensa ajurudang governor-i pa tajungtiba agi yaritep, saka camp tem ketdangsütsü atema tangar nem mapa lemzüktsüba sülen, bendanga amshitsü tenzük, ta Bishop William Naga-i osangbener dang ashi.
“Parnoki refugee tem nem chiyungtsü agütsür saka na Khristan ka süra, parnok nü nem chiyungtsü magütsütsü. Teyariji Khristantem atema masü ta parnoki odiodia ashir” ta paisa shisem.
“Nigeria anüdoklentip tsütsü Boko Haram-i Khristantem dak tenük yoka mapa inyaker saka parnoki Muslim nungertema amakba ajanga, displacement camp ketdangsür Muslim teloktemi tamasa Muslim nungertem yarir” ta Open Doors U.S.A., communications director, Emily Fuentes-i Christian Post dang ashi.
“Nigeria nung Muslim nunger nütsüng teimba lir aser khenkhenbo parnoki Khristantem tarensena nokdaka alidang tesüleni nungzüka yoker” ta Emily-isa shisem.
Displacement camp tem nung Khristantem bendanga amshiba ajanga Open Doors aser local partner temi Khristantem atema displacement camp tem lapokogo, ta Christian camp ka nung chairman John Gwamma-ia ashi.
“Boko Haram teloki kanga mejungi mapa inyaker. Parnoki aonung amaker aser teburtem dang masü saka tetsür o tanurtem dena amaker. Parnoki aiben teburtem tepseter, kechiyong kibong nung paji tekolak aser tebu ka melira kibong nung timtem ajurutsü ta tangatetba nung teburtem amaker” ta Fuentes-isa osangbener dang ashi.
Parnoki tebu ka tepsetra kibong ajunga timtemtsü ta bilemer. Nigeria nung tanur aika asor aser onoki tanur pungu-trok anir amitsürtem aika ajuruogo, ta laisa shisem.
Fuentes ya küm pezü tejaklen Nigeria-i ao aser lai idakji alirtem dang Boko Haram züngsemtemi mapa inyakba indang metettsü asüngdangdang, Boko Haram züngsemtemi police ketdangsertem ama sübor border checkpoints nung garitem mita repranger, ta angazük.
“Parnoki gari nung mena alirtem rongnung Muslim mesüra Khristan tenüngtem metettsü meranger. Ni John ta ser nisung ka den ajurutepa sensaksemdang, pai ashiba agi Boko Haram kiralongrartemi pa ID meshia reprang aser idakji John ta zülua aliba agi pa dak injang kahloktsü. Ajisüaka, pa kanga dang tia kaa tasüba nung jenbu” ta Fuentes-isa metetdaktsü.
Open Doors-i Nigeria nung yariteptsü atema online donations agizüker. Parnoki Nigeria nung relief agütsütsü atema mapa inyaker aser tenla aika bendentetra tanga African linüktem yaritsü, ta parnok indang website nung shia lir.