Nigeria election agitsü mapangtong nung thinenogo

Abuja, Tsüklai/Feb. 16 (Agencies): Nigeria nung tir aser parliamentary election agitsü ghonda pongu lia hopta ka thinenogo.
Logistic tebilemtsütem aliba ajanga iba election ya February 23 nü agitsü, ta electoral commission ajanga ashi.
“Logistic aser operational sentongtem kanga kümdanga asadangba aser timi tesunep nung tejangja election agitettsü mechi tang lateta aliba election ya tapet masü ta commission-i angateter,” ta Independent National Electoral Commission (INEC) mendenpuba, Mahmoud Yakubu-i Honibar anepdang Nigeria yimtiba Abuja nung senden amenba sülen metetdaktsü.
“Commission ajanga iba telemtetba agitsü ya kanga tasak liasü, saka takok ngua election agitettsü aser asen democracy akhangshitsü asoshi tenüngdakba maparen ka lir,” ta pai ashi.
Iba election thinenba osang ya sangdongtsü ghonda ishika liaka Africa nung nütsüng timtiba aliba linük kübok state aika nung ballot osettem metongi liasü.
Governor atema aser local election March 2 nung agitsü aliba ya March 9 nung agitsü.
Iba election nung shilem agitsü asoshi Nigeria nunger aika memejangi atatepa liasü, saka iba telemtetba angashia ain adoktep.
“Ibai maksütsü mapa lir. Asenoki alima dang koma ashitsü? Election agitsü küm pezü tashi sentong yanglua aru aser ghonda 24 dang ishiba lia logistic tebilemtsü indang jembir. Ibai asayamenü tulu ka lir,” ta shishilembar Stephen Akpan-i osangbener dang ashi.
“Tang ni kanga jashia lir. Abuja nung vote agütsütsü mechi ni business trip ka thinen aser tangbo parnoki kü indang trip ya ano melenshidaktsünür,” ta pai ashi.
Nisung aikati social media nung parnok tejasshiba lemsatep.
Kasa mapang opposition telok tuluba, Peoples Democratic Party (PDP) temi election anogo melenshiba nung tai pua nokdak.
“Tim masüba mapa inyaktsü merangba aika nung tamakok anguba ajanga parnoki INEC dang election anogo melenshidaktsütsü tashiyim agi ajungmeso kong iba atema kuli tejangja makaba bener arur,” ta PDP mendenpuba, Uche Secondus-i ashi.
“Temulung melemtettsüsa aliba kar jangjashija iba mapa ya kanga majung ta PDP-i ajiteter aser election mapang nüburtem tsübudaktsütsü aser aridoktsü mechi hooded security yoka liasü,” ta paisa ashi.
Tawa state kar nungbo electoral commission office tem rongdoktsü aser election indang osettem bener ao.
2015 küma Boko Haram teloki amokmerenba sülen electoral commission ajanga election anogo thinena liasü.