Nigeria mitkartemi nisung 178 shi kümzüka anitetogo

Lagos, August 03 (Agencies): Nigeria mitkartemi Nigeria northeast tsütsü tentetba Boko Haram teseptem amakba sülen kiralongrartemi pur yua alir nisung 178 shi kümzüka anitetba osang ka mitkar ketdangser kati tanü Hombar nü metetdaktsüogo.

“Ozü mitkartemi Boko Haram tesep ishika makdokba sülen tila tanur 101 den külemi, tetsür 67 aser tebur 10 densema ajak agi nisung 178 shi kümzüka anitetogo,” ta mitkar otongdar, Col. Tukur Gusau-i ashi.

Par miktartemi Maiduguri yimti nungi southeast tsütsüleni mile 45 shi pilar Bama nung Boko Haram teloki tentetba tesep ishika amakba den külemi, par mitkar tayimtsütem amshia Bama nungi southwest tsütsüleni mile 30 shi pilar Bitta yimtsüng nung jenoka alir Boko Haram züngsem aika tepset ta pai metetdaktsü.

Ajisüaka, tan amakba maparenji kodang agi iba osang tejangjabo pai memetetdaktsü.

Nigeria mitkartemi Boko Haram ket nungi nisung 71 tashi taoba hopta kümzüka anitetba osanga bushiteta lir.

Taküm küm tenzüker tanü tashi nung Nigeria mitkartemi Boko Haram teloki tashiyim agi pua ayur nisung noklang aika kümzüka anitetogo saka parnok rong nung April, 2014 nung Chibok yimtsüng nungi tashiyim agi pur aoba tetsür 219 rong nung ka dang densema maliba osang bushiteta lir.

Ano külen, Boko Haram telokia Borno aser Yoba na nung tenteba mitkar tesep ishika amakba video ka Twitter ajanga yashi Deobar nü alima dang sayuogo.