Nigeria nem teyari agütsütsü maparen anener: UNICEF

Geneva, July 29 (Agencies): Nigeria anüdoklentip tsütsü, Borno state nung alirtem nem teyari agütsütsü maparen anena atatsü renemba osang ka United Nations kübok tentetba United Nations International Children’s Emergency Fund (UNICEF)-i tanü, Hokolbar nü metetdaktsüogo.
Mejangjatetba amakertemi teyari agütsütsü osettsüset aser teyariteper aniba gari convoy Nigeria anüdoklentip tsütsülen yashi, Brehostibar nü amak aser iba amakba den sentakba bushisüngdang tembanga magi tashi teyari agütsütsü maparenji anena atatsü asoshi UNICEF-i renemogo.
“Tan lendong nung yirur rong nung ozü ketdangser 1 aser contractor 1 na densema, tena mozükidang tang anepalua lir,” ta UNICEF-isa metetdaktsü saka par tenteti tan lendong atalokba den sentakba osang tangabo memetetdaktsü.
Teyari osettsüset bener Nigeria northeast tsütsülen, Maiduguri yimti nung Bama jila bushia aoba gari convoy-i Borno state ajangdang yashi lendongji ajuruba osang jangjaogo.
Tan lendong atalokdak ya Nigeria sorkar anemer kiralongrar telok,  Boko Haram-i par tongti tesep tentetba tesem ka lir.
“Tan amakba maparen inyakba ya nungdakbapur nem teyari agütsür amakba dang masü saka teyari nungdaka alirtema amaker lir,” ta UNICEF-isa shisem.
Nigeria nung tensa kanga mejungi aküm ajanga Borno State kisüng nung nisung 500,000 dak temai tang teyari nungdaka aliba osang ka Doctors Without Borders telokia metetdaktsüogo.