Nigeria northeast tsütsü 32 pokset; 80 shi yiru

Yola, November 18 (Agencies): Nigeria northeast tsütsü Yola yimti nung bomb lendong tesashi ka tanü Bodbar nü atalokba osang ka Nigeria nung tentetba National Emergency Management Agency (NEM)-i metetdaktsüogo.

Yola yimti nung tentetba süngjanglijang shishilembadak atalokba bomb lendong nung ishiba agi nisung 32 poksetba aser nisung 80 shi yiruba osang tang tashi nung jangjaogo ta par teloki ashi.

Tan lendong atalokdaktsüba atema telok shingaia tang tashi nung tenüng agia mali saka taoba mapanga tan amala lendong mapang shia atalokdakja arur, Boko Haram kiralongrar teloki tan lendongjia atalokdaktsü südi ta ketdangsertemi temulung malemba olen ka metetdaktsüogo.

“Tan Yola yimti nung atalokba bomb lendong nung ishiba agi nisung 32 shi poksetba aser ano nisung 80 shi yiruba osang tang tashi nung jangjaogo,” ta NEMA regional otongdar, Alhaji Sa’ad Bello-i osang jangjashitsü.

Nigeria Islamist yimli kümdaktsütsü nükjidong nung taoba küm 6 tejaklen nungi tenzüka Nigeria sorkar den tongpang raraba den külemi, tai maketba nübur meyirijang jenti tepsetba telok, Boko Haram-i taoba October ita lendong atalokdaktsüba sülenbo tan mezüngsüa Nigeria nung lendong atalokdaktsür lir.

Par teloki Nigeria kübok Yola aser Maiduguri yimti na nung taoba October ita lendong atalokdaktsüba ajanga ishiba agi 37 tashi südaktsüba osang jangjaogo.

Boko Haram telok meshimeshia samatsütsü nangzüksang, Nigeria Tir tasenba, Muhammadu Buhari-i taküm 2015 küm May ita nungi tenzüka linük lenisang menden benokba anogo nungi tenzüka tanü tashi nung Boko Haram teloki nisung 1000 shi tepsetba osang bushiteta lir.

Boko Haram teloki taküm küm tetenzüklen tashiyim agi agiba tesemtem Nigeria mitkartemi tanaben agiba sülen Boko Haram teloki shishilembadak, bus gari anendak aser külemküjadak balala aser yimdak yimtsüng nung tan amala lendong atalokdaktsütsü tenzükba osanga bushitetogo.