Nigeria northeast tsütsü nisung 40 shi pokset

Damaturu, October 08 (Agencies): Peisasa pokseta asütsü mulungtettertemi Nigeria northeast tsütsülen tentetba state 2 nung mosque ki ana tashi poksatsüba den külemi, nisung 40 shi pokseta südaktsüba osang jangjaogo ta ketdangsertemi metetdaktsü.

“Piesasa pokseta asütsütsü mulungtetba tetsür kiralongrar kati Yobe state kübok Damaturu nung tentetba mosque kilungi tanep 6:00 ako meta ia la temang nung alenokba bomb pokdakja tekülem kidang sarasadema alirtem poksetdaktsüba osang jangjaogo,” ta Nigeria mitkar otongdar, Colonel Sani Usman-i osang jangjashitsü.

Tesülen, nüburtemi temulung melemi bilema tasüngdangba sentong tenzükdang tanabuba peisasa pokseta asütsütsü mulungtetba tetsür kiralongrarlai la temang nung alenokba bomb pokdakja tanabuba lendong atalokdaktsü ta pai shisem.

Damaturu nung atalokba bomb lendong nung ishiba agi nisung 15 shi asüba osang tang tashi nung jangjaogo ta pai metetdaktsü.

Ano, Fulani nunga peisasa pokseta asütsütsü mulungtetba kiralongrar kati pa temang nung alenokba bomb pokdakja nisung 15 shi tepsetba osang jangjaogo ta Damaturu Police Assistant Superintent, Toyin Gbagedesin-ia metetdaktsü.

Kidangsüa aliba Borno State kübok Gubio jila nung tentetba mosque nunga peisasa pokseta asütsü mulungteter anati pei temang nung alenokba bomb pokdakja lendong atalokdaktsüba ajanga ishiba agi nisung 12 poksetba osang jangjaogo ta pai shisem.