Nigeria nung Boko Haram anema raratsü tongti senden amen

France Tir, Francois Hollande (Tiyongtsü)-i Nigeria kübok Abuja yimti nung ayongba Boko Haram telok samatsütsü senden nung adentsü asoshi senden amendak tonga aodang agiba noksa ka yangi angur. (Abuja, May 14)

Abuja, May 14 (Agencies): Nigeria-i ayonger külen par linük yimtiba, Abuja nung Africa aser West linük lenirtemi Boko Haram ta ajaba kiraongrar telok anema raratsü senden ka tanü, Honibar nü menogo.
Boko Haram teloki West Africa nung lendong kanga sashia atalokdakja tensa kanga mejungi kümdaktsür ta United Nations (UN)-i sangoktsüba mapang ka nung Benin, Cameroon, Chad aser Nigeria nungi lenirtemi US, Britain aser European Union (EU) nungi tongti ketdangsertem den ajurua tan sendenji amener lir.
France Tir, Francois Hollande-ia tanü senden nung tongti shilem agiba osang angazükogo.
“Tanü senden nung shilem agirtemi aroki lungjemer Boko Haram telok anema maneni raratsü tezüngzüktep agiogo,” ta Nigeria Tir, Muhammadu Buhari’er media advisor, Femi Adesina-i metetdaktsü.
Küm 7 tejaklen nungi tenzüka, Nigeria northeast tsütsülen densemba tesemtem aser kidangsüa tentetba linüktem nung lendong kanga sashia atalokdaktsüba Boko Haram telok meshimeshia samatsütsü nükjidong nung Africa aser West linük mitkartemi aroki lungjemer par telok anema raratsü ajungshitsü nükjidong nung Nigeria-i tan sendenji jatepba osang angazükogo.
Boko Haram teloki lendong atalokdaktsütsü tenzükba sülen tanü tashi nung Nigeria aser kidangsüa aliba linüktem nung nisung 20,000 dak tema tepsetba aser nisung million 2.6 shi pei talidak toktsütsüsa akümba osang ka UN-ia metetdaktsüogo.
“Nigeria mitkar den külemi, kidangsüa aliba linüktem den loktepba mitkartemi Boko Haram telok madak takok tulu angutsü tenzükogo. Ajisüaka, Boko Haram telok tanü tashi mesamatsüteti lir aser iba yongji par teloki tarutsü anogotem nunga maneni lendong tsüngdong bener arutsütsü,” ta Central African Republic (CAR) linük semdangba sülen yasüng, Hokolbar aonung Abuja tonga aosang, Hollande-ia tanü senden nung metetdaktsüogo.