Nigeria nung Metsüremi kisüng nung Khristanpur 225 tepset

Rongchii 10, 2018 (Agencies): Middle Belt nung Fulani telungpurtemi Metsüremi (March) nung lendong agütsüba timba liasü aser talisa Plateau aser Tarava state tem nung tali amak. Taoba ita Fulani temi lendong 27 ben agütsü aser item rongnung trokben dang tangaria parnok den rara liasü.
Lendong 27 ben agütsüba ajanga Khristanpur 225 taküm sama, sen aika jenjang ki-o-jen raksatsü aser kibong meyerijang aika pei kidang nungi tesem balalai prokshitsüsa aküm. Kasa mapang Boko Haram telungpuri nisung 37 tepset aser item rongnung timba mitkartem lir. Iba asadangba ajanga Fulani telungpuri tang teraksa bener arutsüba ya tuluba aser iba telok ajanga raraba nok-o-nü maben aliba civilian tem dak amakba shilem 70 dak tali kümogo ta sayur.
Iba mapang Plateau State nung takoksa tuluba ajuru, kong Khristanpur taküm 107 samatsü. Iba ama lendong timtem agüjaka Nigeria sorkari Fulani telungpur anema mapa meinyaker.
Metsüremi nung lendong tulu agütsüba kar yamai alitsü:
1. Metsüremi 5, 2018: Okpokpwu LGA kübok Omusu nung aliba Idoma yimtsüng nung Fulani teloki nisung 24 tepset.
2. March 12, 2018: Kwal nung aliba Dundu tesem nung Fulani telungpuri nikongdang amak. Iba lendong nung nisung 25 tepset.
3. Metsüremi 14, 2018: Fulani telungpuri Dekina aser Omala LGAs nung yimtsüng aika amak. Iba mapang nisung 32 taküm sama ta osang liasü saka iba lendong ajanga taküm samar nisung 50 liasü. Iba azüdokshi sülen nisung noklang aika pei talidak nungi tesem balalai jena ao.
Iba tensa atema telangzüba shidak agütsütsüla. 2018 küm tenzüker tang tashinung Boko Haram telungpur dang Fulani telungpuri nisung timba tepsetogo aser tesem tuluba nung kongshia lir. Iba ama lendong timtem jenti liaka Nigeria sorkari mapa parno nokdangtsü asoshi mapa balaka meinyaker aser telungpurtemi nisung tepseter. Tesem kar nungbo sorkari mitkartem yoka lir, saka parnoki mapa junga meinyaker.