Nigeria nung mosque apokdang nisung 18 asü

Maiduguri, Nigeria nung mosque ka poksatsüba nüburtemi reprangtepba noksa nung angur. Taküm tenla agüja tapoktsü apoker tebur anati iba lendong agütsüba mapang mosque-i anepdang sarasadem-i arurtem, tajemba agi nisung 18 pokset.

 Abuja, October 23 (Agencies): Nigeria nung aliba Borno state nung Hokokbar nü mosque ka nung tapoktsü ka apokdang tajemba agi nisung 18 pokset, ta National Emergency Management Agency ajanga metetdaktsüogo.

Linük nung relief agency kati, Maiduguri yimti nung, iba nü asoshi mezüng lokti saradem agiba mapang tapoktsü lendong ya ataloka liasü, ta ashiba Xinhua news agency ajanga metetdaktsü.

Mozü kidang inyakertemi ashiba agi, iba lendong nung nisung 17 tashi yiru.

Taoba hopta-a taküm tenla agüja temang nung tapoktsü alenloker apoker tebur anati Borno state yimtiba, Maiduguri nung aliba Molai tesem nung tapoktsü pokdaktsüba mapang nisung 29 asü, tasür rongnung timba ka sarasademi arurtem liasü, ta relief agency nung ketdangsertemi ashi.

Iba lendong ya Boko Haram telok nem tongloktsüogo. Boko Haram telok ya Islamic State akümtsü asoshi sorkar den rarar telungpur lir aser parnoki küm aika Nigeria anüdoklentip tsütsü linük yimtiba nung taopktsü tesashi amshia lendong agüja nisung tesepta arur.

Nigeria Tir Muhammadu Buhari-i linük nung aliba sepai tulurtem dang December ita tashi nungbo Boko Haram meshimeshia samajang ta ozüng agutsüogo.

Aji oda süaka Tir-i lateta yutsüba mapang tashi nung meimchir maochi-i tepseter telok, Boko Haram samatsütsü asoshi sepaitemi akoktsü asü makoktsü ta nüburtemi shisa buluja bilemer kechiba süra Tir-i iba ozüng agütsüli nung item telungpur yagi manenei taküm tenla agüja taopktsü jenti poka taküm samaja arur.