Nigeria nung nisung 15 pokset, 41 shi yirutsü

Abuja tezülen, Nyanya jila nung bomb lendong ka yasüng, Hokolbar aonung atalokdaktsüba sülen Nigeria police ketdangsertemi lendong atalokdak bushisüngdangba noksa nung angur. (Nyanya, October 03)

 Abuja, October 03 (Agencies): Nigeria yimtiba, Abuja tezülen jila ana nung bomb lendong 2 tashi atalokba ajanga ishiba agi nisung 15 poksetba aser nisung 41 shi yiruba osang jangjaogo ta Nigeria ketdangsertemi tanü Honibar nü metetdaktsüogo.

Abuja tezülen tentetba Nyanya aser Kuje jila na nung bomb lendong ana tashi yasüng, Hokolbar aonung atalokdaktsüba osang jangjaogo ta parnoki ashi.

Tan lendong atalokdaktsüba asoshi telok shingaia tang tashi nung tenüng agia mali saka Boko Haram kiralongrar teloki iba amala lendong mapang shia atalokdaktsüba yong tan lendongjia par telok mapasa asütsü akok ta ketdangsertemi temulung malemba olen ka metetdaktsüogo.

Nigeria kübok Maiduguri yimti nung tetsür ana densema peisasa pokseta asütsü mulungtetba Boko Haram züngsem 4 tashi yashi, Hokolbar nü lendong atalokdaktsüba sülen tan lendongji ataloker lir.

Yashi atalokdaktsüba lendong nung nisung 14 poksetba aser nisung 39 shi yirutsüba osanga bushiteta lir ta ketdangsertemisa metetdaktsüogo.

Nigeria Islamic yimli ka kümdaktsütsü merangba Boko Haram teloki 2009 küm nungi tenzüka Nigeria sorkar anemtsü tenzükba sülen tanü tashi nung nisung 10,000 dak tema tepsetba osang bushiteta lir.