Nigeria nung nisung 200 dak tali tepsetba ajanga Khristanpur aoksar

Jos, Aami 28 (TYO): Muslim Fulani shiruru metsürtemi nok aser raradang amshiba oset bener arua Jos, Nigeria anasa Khristanpur timba aliba tesem 10 nung nisung 200 dak tali tepset. Iba lendong ya Küptoknü, Amungnü aser taoba hopta atalok aser iba ya nashi auyaba mechi mangyangba mapa südi, ta nashi metsür indang odongtari ashi.
Khristanpur timba aliba tesem nungya nisung 86 dang tepset, ta Jos nung aliba police temi ashir, saka iba tesem nung alir aser nisung tasümang ayur ajanga Morning Star News dang ashiba agi, nisung tasümang ya aika lir. Barkin Ladi tesem nung Gashish District kübok Nghar yimtsüng nunga Fulani temi nisung 70 dak tali tepset, ta iba yimtsüng nungi Dogo Nvou-i ashi.
“Kübu tanubu, pa kinungtsü aser kinunger aika tepsetogo. Ozü yimdak nisung 70 dak tali tepsetogo. Tsüngremi dang onok anisüngzüktsütsü,” ta pai text message ajanga ashi.
Aami/June 23 aser 24, 2018 anogotem nung Khristanpur timba aliba Xland, Gindin Akwati, Ruku, Nghar, Kura Falls, Kakuruk, Rakok, Kok aser Razat yimtsüngtem amak. Item yimtsüngtem ya Barkin Ladi Local Government Area (LGA) indang Gashish aser Ropp district tem nung lir.
“Nghar yimtsüng kisüng nunga Khristanpur tasümang 70 shi ngutet aser yimtsüng ajunga ya Fulani shiruru metsürtemi rongdoktsü, aser item asürtem ya Church of Christ in Nations (COCIN) nung züngsemtem lir,” ta iab tesem nung alir arishi küm 45 tain, Thomas Chuwang-i Morning Star News dang phone ajanga Tentonü (Aami 25) ashi.
Morning Star News nungi nisung kar Jos nung aliba Jos University Teaching Hospital aser Plateau State Specialist Hospital semdang aser iba mapang nisung tasümang 216 sayu, ta osang ka ajanga ashi.
Plateau Governor, Simon Lalong-ia iba lendong nung nisung 200 dak tali tepset aser meyirijang aika talitsü ki aser alo raksatsüba ajanga tesem balala nung prokshi, ta ashi.
“Tai maket nüburtem, tetsür aser tanurtem tepseta azü agi temang sünga aliba onok mulunjang nung maneni lir, aser iba ajanga temelenshi tulu nüngdaker aser iba ama mapa tamajung inyakba ya teti asoshi anentsü nüngdaker ta osang agütsür,” Lalong-i ashi.
“Iba ama lendong tanaben asendenshir atalokba ajanga nisung tamajungertemi mapa tamajung inyaktsü tesem agütsür, shirnoki anogoshia kiset shiruru auyar, nisung telok arua oset balala rakzükraktema bener aor aser peangbong bener nüburtem amokmerener,” ta paisa shisem.
Xland aser Gindin Akwati yimtsüng nunga shiruru metsürtemi Khristanpur 60 shi tepset, ta iba tesem nung alir John Isa-i phone ajanga Morning Star News dang ashi.
Kakuruk yimtsüng nunga kasa shiruru metsürtemi COCIN tenlaki aser pastor indang ki rongdoktsü.
“Tenlaki, pastor indang ki aser tangar indang ki aiba item shiruru metsürtemi rongdoktsü. Ni iba lendong nungi jena aodang nisung tasümang ka angu. Onok nisung 200 dak tali anasa mitkartem aliba tesemi jena ao,” ta iba tesem nung alir arishi küm 35 tain, Christiana Audu-ia ashi.
“Sorkari repranga lia ozü nüburtem tepseter aser linük temzüng sülen anidaker taküm kümzüka meyuteter,” ta Nigeria indang National Assembly nuntg züngsem, Istifanus Gyang-i Aami/June 25 nü sangdong.
State sorkari item tesem kar nungbo anepdang nungi anülu tashi curfew sangdonga lir.
Miyetti Allah Cattle Breeders Association of Nigeria (MACBAN) mendenpuba, Danladi Ciroma-ia iba lendong ya aitsü saka ya mangyangba mapa ka südi, ta ashi.
“Nisung meimchir tepsetba ya ni aitsür, saka ochi jembitsüla aser iba lendong ya mangyanga inyakba sentong ka südi,” ta pai ashi.
“Taoba hopta eshika tsüngta Fulani shiruru metsürtem ya nashi 300 shi sama, Fan yimtsüng nungi raraba oset bena aliba Berom lanurtemi nashi 94 auya aser parnokisa nashi 36 tepset. Iba den külemi shiruru 174 auya,” ta paisa shisem.
Saka iba tesem nung aliba Khristanpurtemi shiruru anepalutsü memetet nung kotaser Ciroma-i ashiba ama nashi aika auyatsü, talisa tesem ajunga nung mitkartem indang check-point aliba ajanga taküm shiruru aika bener aotsü tasak, ta ashir.
Taoba küm ti tsüngta Barkin Ladi aser Riyom tesemtem nung Khristanpur yimtsüng 50 shi samatsü aser shiruru metsürtemi agi, ta Khristan lennir temi ashir.
Iba ama azüdokshi mapa inyaker ya aputsüla, ta Khristanpur aser nüburtem temeden asoshi nokdaker lokti balalai akhanger, saka Nigeria Tir, Muhammadu Bhurai-i aniba sorkari tang tashi mera tasen agiloka mali.