Nigeria nung suicide bomb agi nisung 15 pokset

Maiduguri, July 12 (Agencies): Northeast Nigeria nung aliba Maiduguri yimti nung pei sasa temang nung bomb inoker pokdaktsüba (suicide bomb) lendong ka Mongulbar aonung adalokba nung nisung 15 pokset aser 21 yiru, ta police ketdangsertemi metetdaktsü.
Nigeria linük nung Boko Haram telok den küm ti tashi rara aruba mapang Borno state ya tamajungba kongshia lir aser Maiduguri ya iba state indang yimtiba lir.
Iba lendong nung asür ya timba civilian dang lir aser parnok ya mitkar indang tesem ka anükba mapang lendong ya adalok, ta Borno state indang police commissioner, Damian Chukwu-i osangbener dang ashi.
“Item bomb pokloktsürtem ya parnok temang nung IED (improvised explosive device) sendakloker iba tesem nung pokdaktsü aser bomb pokdaktsür ya densema nisung 19 asü aser 23 yiru,” ta Damian-i ashi.
Civilian Joint Task Force (JTF) telok dak tenük yoker iba lendong ya agütsü südi, ta Civilian Joint Task Force (JTF) indang odongtar aser Borno State Emergency Management Agency (SEMA) indang chief security officer, Bello Danbatta-ia ashi.
Boko Haram jihadist den raraba mapang mitkartem nem teyari agütsür aser parnok den külemi rarar, JTF züngsem temi checkpoint ka nüka aliba mapang bomb pokloktsür nisung ana iba tesemi arua parnok sasa bomb ya pokdaktsü aser iba mapang parnoka asü.
“Iba lendong nung tasü tait JTF züngsem nisung 12 taküm samaogo,” ta Bello Denbatta-i shisem.
Nigeria nung 2009 küm nungi tenzüka Boko Haram telungpur den raraba mapang nisung 20,000 jungnüa tepsetogo aser million 2.6 dak tali talidak ki melie kümdaktsü.
Boko Haram telok ya samaogo, ta Nigeria sorkar aser mitkartemi ashir saka tesem tezülen item teloki maneni amaker aser suicide bomb poklokja arur.
Item teloki tetsürtem amshia mitkar indang checkpoint, Muslim nunger indang tekülem ki, shishilembadak aser bus station amala tesemtem amaker.
Taoba ita Muslim nunger indang temeshi ita, Ramadan tembanga Eid al-Fitr benjung mapang iba yimti nung suicide bomb poklokja nisung 9 tepset.
Maiduguri yimti tezülen aliba University of Maiduguri nung ‘western education’ tesayuba agütsüba anema Islamic State of Iraq & Levant (ISIL/ISIS) den sendaktepa aliba Boko Haram teloki iba tesem nung aiben lendong agütsür.