Nigeria nunger kaketshirtem amakba atema India ketdangser jaok

Abuja/New Delhi, March 30 (Agencies): Tawa India nung telok kati Nigeria nunger kaketshirtem amakba dak sentakba nung Nigeria-i Abuja nung aliba India ketdangser jaoka liasü.
Iba mapang nung Nigeria ketdangsertemi India ketdangser dang, India nung iba ama tatalokba ya tang mezüng masü, aser iba atema tebilemtsü akar ta shiogo, ta Foreign Office ajanga metetdaktsü.
Ministry of Foreign Affairs Nigeria, Permanent Secretary, Sola Enikanolaiye-i Bodhbarnü Abuja nung Indian High Commissioner, Nagabushana Reddy jaoka liasü.
“Indian High Commissioner den senden amendang ni pa dang Nigeria nunger amakba atema mepelaba metetdaktsüogo,” ta Enikanolaiye-i twitter ajanga ashi.
Paisa, Indian High Commissioner-i iba tatalokba atema India sorkari agiba meratem metetdaktsü aser ochi obendang agutsütsü ta metetdaktsüogo, ta ashi.
Ano külen tanü Rajya Sabha nung External Affairs Minister, Sushma Swaraj-i, Uttar Pradesh, Greater Noida nung Africa nunger kaketshirtem anema inyakba tatalokbaji tashishitsü meketi junga bushisüngdangtsü, ta metetdaktsü.
Zero Hour mapang opposition züngsemtemi asüngdangba langzüdang Swaraj-i, iba tatalokba ya tia maka aser Centre sorkari state sorkar dang nungi osang meshiogo, ta ashi.
Sushma-i, “Tatalokba anapronglaji tai maka tatalokbatem lir. Mezüngbuba nung, arishi küm 19 tebur ka asü aser iba sülen Nigeria nunger kaketshir ka dak azük. Uttar Pradesh Chief Minister aser kü tenüng nung ni ya züngbong ashir, tashishitsü kecha makai item tatalokba junga bushisüngdangtsü,” ta ashi.
Minister-isa, state ketdangsertemi tzüzüng-ozüng benoktsü atema inyakdar, aser Nigeria nunger kaketshir sangji hospital ka nung yaridar, ta ashi.
“Bushisüngdangba maparen metembang tashibo ni iba dak tali jembitsü makok,” ta laisa ashi.