Nigeria o Cameroon nati külemi lungjemer Boko Haram anema raratsü nangzükteper

Yaounde, July 30 (Agencies): Nigeria aser Cameroon nati külemi lungjemer Boko Haram ta ajaba Islamist kiralongrar telok den raratsü tezüngzüktep agiba osang ka Nigeria Tir, Muhammadu Buhari aser Cameroon Tir, Paul Biya nati tanü Brehostibar nü metetdaktsüogo.

Buhari-i taküm March ita Nigeria Tir menden benokba sülen tan mezüngsüa Cameroon semdanger lir.

Buhari-i par semdangbaren tembanga par linüki meyipa aoba jakdang Biya den aroki osangbener den tanü ajurutepdang par linük anati Boko Haram telok den raratsü renemba osangji metetdaktsü.

Tang Iraq aser Syira na nung lendong kanga sashia atalokdaktsüba Islamic State (IS) kiralongrar telok tetsüti den sentakteper ta tawa sangoktsüba Boko Haram teloki taoba ita 2 tsüngda nung Nigeria den külemi, kidangsüa aliba Cameroon, Chad aser Niger nunger nung nisung noklang aika tepseta lendong atalokdaktsüba sülen Buhari-i tan Cameroon semdanger lir.

“Boko Haram telok meshimeshia samatsütsü asoshi ozü linük anati külemi lungjemer par telok den raratsü nangzüktepogo,” ta lenir anati tanü sangoktsü.

Ano külen, Nigeria, Cameroon, Chad, Niger aser Benin nungi mitkartem yoka tentetba teloktep mitkar teloki tan July 31 nü nungi tenzüka Boko Haram telok mita parnok amaktsü maparen tenzüktsü renemba osang jangjaogo.

“Boko Haram anema rarabaren nung G7 tenteti yariteptsü nangzüka lir anungji, par tenteti tan tentetba teloktep mitkartem nem tongpang raratsü terenemshiba agütsüba den külemi, tongpang nung amshitsü osettsüseta agüja yaritsü imlar,” ta Buhari-i metetdaktsü.

Taoba mapang, 1993 nungi tenzüka, par linük ana tsüngda adokba arrtsü den sentakba mangatettep ken o benteta par linük ana tsüngda tesendaktep junga yanglushitsü nükjidong nung Buhari-i tan Cameroon semdangba osang jangjaogo.