Nigeria: Polio tashidak aketer meputeti küm 1 abensar

Lagos, July 24 (Agencies): Nigeria-i tesüsa polio tashidak aketer putetba sülen küm 1 abensaba ajanga par linüka polio tashidak meshimeshia samatsür aliba alima linüktem rong nung joko züngsemtsü ta tamang akatsü tenzükogo.

Nigeria nung tesüsa polio tashidak keta alir nisungji Nigeria anüdoklentip tsütsü Kano state kübok Sumila district nung yaküm 2014 bushiteta liasü.

2009 küm tashi nung Nigeria nung nisung 338 dak polio tashidak keta aliba osang bushiteta liasü saka yaküm tashi nungbo polio tashidakji nisung 6 dak dang keta aliba osang bushiteta par linük nung polio tashidak agi shiranger kanga dang ajema aküma kuli ngutet ta World Health Organization (WHO)-ia metetdaktsü.

WHO ketdangsertemi Nigeria tonga oa idakji tendanga nungdakba bushisüngdang agiba sülen polio tashidak keta alir ka danga meputetra, par WHO tenteti renemba polio tashidak bushiteta aliba linük tarensen nungi Nigeria linük ya taruba hopta 6 tsüngda nung agientsü renema lir.

Ajisüaka, Nigeria linük nung polio tashidak khen yongi mali ta asütsü atema anosa küm 2 shi tendanga atatsü tajungshiba olen ka mozü mongintemia metetdaktsüogo.

“Polio tashidak mapang tatsüka asoshi meputetbaji tejakleni mera tajung ka agir lir. Ajisüaka, Nigeria nung polio tashidak meshimeshia samatsütsüji ang ozü alizüng lir,” ta Nigeria nung tentetba National Primary Healthcare Development Agency (NPHDA) nung executive director, Ado Muhammad-ia metetdaktsü.

“Nigeria nung polio tashidak meshimeshia samaogo ta sadok sadoka ashitsü asoshi anosa küm 2 shi anünga lir,” ta Nigeria ajunga nung polio tashidak meshimeshia samatsütsü asoshi taoba küm 45 tejaklen nungi tenzüka nungdakba maparen inyaker aser Nigerian Academy of Science (NAS) Tir, Oyewale Tomori-i ashi.

Nigeria-i tang nguteta ama, par linük nung polio tashidak meshimeshia samatsütsü asoshi maneni nungdakba maparen bendanga agüja inyaktsü tajungshiba olen ka Muhammad aser Tomori na den külemi, alima ajunga nung nungdakbapur nem angati agi teyari agütsütsü asoshi tentetba Rotary International aser Bill & Melinda Gates Foundation nati metetdaktsüogo.

“Nigeria-i par linük nung polio tashidak samatsütsü asoshi kanga meranga inyakogo saka polio tashidak meshimeshia samatsütsü maparenji tangasa metembangi lir,” ta Bill & Melinda Gates Foundation nung deputy director, Michael Galway-ia metetdaktsü.