Nigeria: Tetsür kiralongrar kati 5 poksetdaktsü, 28 shi yirutsü

Abuja, August 25 (Agencies): Peisasa pokseta asütsü mulungtetba tetsür kiralongrar kati la temang nung alenokba bomb pokdakja tanü Mongolbar nü lendong kanga sashia atalokdaktsüba osang ka Nigeria police-i metetdaktsüogo.

Aiür chanulai la temang nung alenokba bomb-ji Nigeria northeast tsütsü, Damaturu jila nung tentetba bus station anasa pokdakja la idakji pokseta asüba osang jangjaogo ta parnoki ashi.

“Tanep atalokba bomb lendong nung nisung 5 poksetba aser ishiba agi nisung 28 shi yirutsüba osang tang tashi nung jangjaogo,” ta police-i ashi.

Tanü lendong atalokdaktsüba asoshi telok shingaia tang tashi nung tenüng agia mali saka Nigeria Islamic yimli kümdaktsütsü merangba Boko Haram kiralongrar teloki taoba mapang nunga peisasa pokseta asütsü mulungtetba tetsür aser aiür chanutem yoka tanü amala lendong atalokdakja aliba yong tanü lendongjia par telok mapa asütsü akok ta police-i temulung malemba olen ka metetdaktsüogo.

Iraq aser Syria na nung tang lendong kanga sashia atalokdakja aliba kiralongrar telok tetsüti, Islamic State (IS) den sentakteper ta tawa sangoktsüba Boko Haram teloki Nigeria anüdoklentip tsütsü densemba tesemtem nung tai maketba nübur 10,000 dak tema tepsetba osang bushiteta lir.

Ano külen, taruba ita 3 tsüngda nung Boko Haram telok meshi meshia samatsütsü ozüng ka Nigeria Tir tasenba, Muhammadu Buhari-ia par mitkartem nem tawa agütsüogo.