Nigeria tiyongtsülen nisung 44 tashi pokset

Abuja, July 06 (Agencies): Nigeria tiyongtsülen, Jos yimti nung tentetba mosque ka aser restaurant ka na nung pokshiba lendong ana tashi atalokba sülen ishiba agi nisung 44 tashi poksetba osang jangjaogo ta ketdangsertemi tanü Hombar nü metetdaktsüogo.

Yashi, Deobar nü atalokba lendong nung ishiba agi nisung 47 shi yiruba osanga jangjaogo ta Nigeria National Emergency Management Agency-ia metetdaktsü.

Nigeria Islamic yimli kümdaktsütsü nükjidong nung sorkar den raratepa lendong tsüdong kanga sashia atalokdaktsüba Boko Haram teloki tan lendong atalokdaktsüba densema taoba hopta kisüng nung nisung 200 dak tema tepsetba osang bushitetogo.

Ano külen, Yobe state kübok Potiskum yimti nung tentetba tenlaki ka nunga pokshiba lendong ka yashi ataloka ishiba agi nisung 5 poksetba osang jangjaogo.

Peisasa pokseta asütsü melungteter kati tenlaki telungi ia pa temang nung alenokba bomb pokdakja yashi lendongji atalokdaktsüba osang bushitetogo.

Taoba Hokolbar nüa peisasa pokseta asütsü melungtetter tetsür 6 tashii par temang nung alenokba bomb pokdakja Maiduguri anasa lendong atalokdaktsüba ajanga nisung 20 shi poksetba osanga jangjaogo.

Boko Haram teloki Nigeria nung lendong tsüngdong kanga sashia atalokdaktsüba atema par telok aitsüba olen ka metetdaktsüba den külemi, timtem toushi jenti ajurua alir Nigeria nüburtem den yariteptsü melunga aliba olen ka US Department otongdar, John Kirby-ia yashi metetdaktsüogo.

“Nigeria nung lendong tsüdong atalokdaktsürtem pua parnok nem tapet temerenshi agütsütsü maparen nunga ozü US-i Nigeria sorkar aser nüburtem den yariteptsü melunga lir,” ta pai metetdaktsü.

Ano, Nigeria aser kidangsüa aliba Chad, Niger aser Cameroon mitkartemi külemi lungjemer tentetba mitkar teloki Boko Haram telok madak takok tulu ngua raraba atema pelaba olen ka paisa lemsatepa liasü.