Night Schools jenjang ajungkettsü: Javadekar

New Delhi, July 10 (Agencies): Sorkar indang tongtibangtiba mapaji Zilla Prishad schools aser nights schools jenjang ajungkettsütsü, ta Human Resource Development Union Minister, Prakash Javadekar-i ashi.
Tawa Union Cabinet menden melentepdang Javadekar nem HRD Minister menden lemzüktsü aser yasüng pai Mumbai, Dadar nung Gopal Krishna Gokhale Night School semdanga kaketshirtem den jembia liasü.
“Temaba jenjang ajangzüktsü atema shisaliokji nüngdak. Anüngdang ghonda 8-10 mapa meranga inyakba sülen aonung school tem nung azünger sensaker kaketshirtem tanelaji ni tushir,” ta minister-i ashi.
Shisaliokji ajak nem agütsütsüla, nisung shinga mesentoktsüla, ta paisa ashi.
Ajaki shisaliok ngutettsü atema Night schools ji tongtibang reju ka lir aser item jenjang tajungba kümdaktsütsüji sorkar indang tongtibang mapa lir. Sorkari night schools aser Zilla Parishad schools jenjang ajungkettsütsü, ta pai ashi.
Aonung school nung azünger kaketshirtem dang minister-i, “Nenok ajuruba sülen nenok atema kü mapa tashi itshiogo. Ato kilonser Narendra Modi-i, Dalits, maongka mengutetertem aser tepetzük tia nung alirtem atema inyakang ta ashir. Aonung school temi ajangshiba tebilemtsütemji onoki shisadangtsü aser akokba tashi iba atemaji inyaktsü,” ta ashi.
Pai ashiba agi, pa-a Zilla Parishad school ka nung züngogo, anungji aonung azünger kaketshirtemi ajangshiba tebilemtsü aser tayongzükbatem ajakji paia meteta lir.
Minster-isa, pai Maharashtra Education Minister, Vinod Tawde dang night schools aser municipal schools jenjang tajungba akumtsü atema inyaktsü tuyutsü, ta metetdaktsü.
Linük commercial yimtiba, Mumbai nung aliba night schools nung arishi küm 15 ser temapur kaketshir 15,000 dak tema lir, aser parnokji class 8 ser tema nung azüngertem lir.