NIHESW küm 25 ajunger, CS-i yaritsü nangzük

Kohima, Dec 19 (TYO) : Nagaland Institute of Health, Environment & Social Welfare (NIHESW) tenzüker küm 25 jungogo aser iba anogo mong sentong ka tanü yangi Zonal Council, Hall Kohima nung akadang, Nagaland Chief Secretary, Pankaj Kumar-i akok tashi state sorkari yariteptsü nangzükogo.
“NIHESW ajanga kaketshirtem dang science, anema aliba aser tzü mopong indang bilemdanga angazüktsü asoshi tongtibang kümdakja inyaker aser iba jagi tanurtemi science indang tali metettsü jangradaktsür,” ta Kumarisa ashi.
NIHESW küm 25 ajungba mong sentong omen ” Terenlok Tenzüktsürtem” nung ajemdaker jembidang, kaketshirtemi scientific mapatem angatettsü asoshi metetsü asoshi jangratsüla ta metetdaktsü. Kodangsa, temulung nung langka metetnüa aitdir, idangji jet ta züluoka ayutsüla aser ibaji mapang angudang bilemdangtsüla. Iba jagi kaketshirtem timi angazüka aotsüba lenmang nung yaritsü ta Chief Secretary-isa ashi.
Iba sentong nung NIHESW nung tir Prof.K.K.Sharma-i ashiba agi, taoba küm 25 tsüngda temang anema alitsü asoshi inyakba aser tzü mopong kümzüka ayutsü asoshi inyakba den ano arem nung shiruru aser süngdong balaka alibatem bushia parnokji tezüluba nung dena yuogo. Prof.K.K.Sharma ya North Eastern Hill University nung Pro-Vice Chancellor liasü.
NIHESW ajanga school nung Naga nunger tanurtem nem science indang metettsü asoshi District aser state level nung shilem agidaktsür aser parnok rongnung tajungertem shimteta küm shia national level nung shilem agitsü yoker. Ibaji NIHESW nem agütsüba maongka tuluka asütsü.
Ex-Officio Director aser Science & Technology Department nung Secretary, Nikhashe Sema-i ashiba agi, par department kübok tanurtem nem science aser technology ajanga temang anema alitsüsa inyaktsü aser tzü mopong kümzüka ayutsü asoshi tangatetba agüja inyakba telokbo NIHESW ya dang asütsü.
Head of Environment Division, Assam Science Technology & Environment Council, Department of Science & Technology, Jaideep Baruah-i metetdaktsüba osang ka nung ashiba agi, küm shia linük ajungalen nungi National Children’s Science Congress (NCSC) asoshi shimtetba project 20 rongnung Nagaland dena Northeast nungi project pezü-pongokabo shimtetter. Iba jagi Northeast pur kaketshirtemji shinga dang tamajungba masü, maongka dang agütsüra asenoki tajungtiba agütsütettsü ta paisa ashi.
Iba sentong lenir, Honorary Director, NIHESW, Dr. Vizovol Mekro-ia mapang tatsüka agia jembidang, NIHESW tenzükli nungi Nagaland nung alirtema alima nübortem den külemi anema aliba aser tzü mopong kümzüka alitsüba indang tangatetba agütsüba nung kanga yaria aruogo ta ashi.
Iba sentong nung Ministers’ Hill Baptist Higher Secondary School nungi kaketshir ka tenüng agi, Shoniu Shiu-i project presentation mapang tatsüka agia liasü aser iba denji NIHESW indang noksa (movie) sayu aser tetoktepba tapu balala nung shilem agirtem nem tenüngsang agüja liasü.