Nija school 449-i fees tali agiba atema Delhi sorkari tasüngdangba akar

New Delhi, August 18 (Agencies): Delhi nung nija school 449-i school fees kanga tali agiba atema Delhi sorkari tasüngdangba kaogo.
Iba den külemi sorkari item school tem dang, Justice Anil Dev Singh-i teyuba ama fees tali agibaji ajemtsü aser sen tali agibaji tsüraburtem nem meyipa agüjang ta metetdaktsü.
Delhi LG office-i agizükba sülen tanü sorkari iba tetuyuba agütsü.
Delhi nung DPS, Amity International, Sanskriti, Modern School aser Springdales ama nüngtugu school tem school 449 nungji densema lir.
Delhi sorkarisa, “Teyuba ama meinyakra item nija school-ji sorkari agitsü,” ta metetdakja tsürabur dang nungi fees tali agia alibaji hopta ana tsüngda meyipa agütsütsü teyu.
Delhi Chief Minister, Arvind Kejriwal-i, “6th pay commission sülen nija school aikati fees tuogo. Item amaji reprangshitsü atema Anil Dev Singh committee ya tentet. Committee-i teyuba ama school aikati meinyak,” ta ashi.
Kejriwal-isa, “Delhi nung sorkar school-tem jenjang ajungkettsütsü atema sorkari kanga meranga inyakogo. Tsürabur aikati parnok chirnur nija school nungi sorkar school-temi belena yokogo,” ta ashi.