Nija school temi sen atema shisaluyimba mapa meinyaktsüla : Nagaland Angh

Nija school temi sen atema shisaluyimba mapa meinyaktsüla : Nagaland Angh

September 19, 2015 nü Police House Chumukedima nung Nagaland Angh, p.b Acharya den Dimapur District nung Private School tem nungi Chairmen, Principals aser Administrative tongtipurtem külemi agiba noksa angur.

Dimapur, September 19 (TYO): Dimapur nung Private School ketdangsertemi sen atema shisaluyimba mapa meinyaktsüla saka terenlok angudak rejutem kümdaktsütsüla, ta Nagaland Angh, P.B Acharya-i ayongzük.
September 19, 2015 nü Police House Chumukedima nung Dimapur nung aliba Private School tem nungi Chairman, Principals, Administrators nungertem den ajurutepa senden ka alidang Angh-i parnok dang fee agiba inyakyim reprangshitsü mepishi aser sensaker kaketshirtem nem Corporate Social Responsibility sector ajanga teyari agütsütsü ayongzük.
“Shisaluyimba centre kaji shisatsü angudak centre ka dang masü terenlok angudak centre ka asütsüla” ta Acharya-isa shisem.
Nagaland nung Dimapur ya educational centre tajung ka akümer anungji kaketshir nem ‘value based education system’ agütsütsüla. Ibaji asünungdang kechisarena inyaktetba lanurtem anitettsü aser iba jagi state aser linük takar kümdaktsütsü, ta paisa ashi.
Shisaluyimba centre kaji tangazükdak centre ka lir aser item ajanga shisakar nisungtem anitettsü aser parnoki lokti aser kibong atema inyaktsü. Kohima aser Dimapur tsüngda lenmang nung public toilet tajung ka danga mali, anungji nübortemi pei tangatetba melenshitsüla, ta Acharya-isa ashi.
Iba senden nung Dr. Aotoshi, Administrative Head of Delhi Public School-i par school-i inyakba osangtem metetdaktsü aser Angh dang CBSE nung vocational training tenzüktsü atema jembi nung ajungtsü ta ashi.
Livingstone Foundation Higher Secondary School kibur, Andrew Ahoto-i o jembidang, tanga state tem dang nungi Nagaland nung fee structure kanga agi tajemba lir ta Angh dang ashi.
Paisa Angh dang Teachers Award atema nija school nem noklang nung shilem 50 agütsüdaktsünür kechiyong kaketshir noklang nung shilem 65 bo private school tem nung azünger, ta ashi.
Tanü senden nung Dimapur district nung aliba school 28 nungi nisung 37 aden aser ADC Dimapur Elizabeth Ngully aser Commissioner of Police Liremo Lotha nati shilem agi.

You must be logged in to post a comment Login