Nija school temi sensaker dang fee magitsü

Dimapur, June 17 (Agencies): All Nagaland Private Schools’ Association (ANPSA)-i sensakertem kibongtem nungi kaketshirtem indang fee magitsü atema mulunga agizükogo.
Nija school temi anogoshi aayangertem aser nija mapa nung inyakertem yaritsü. Parnok chirnurtem indang fee ji kibong sasep nung reprangtsü, ta Naga Students Federation (NSF)-i metetdaktsü.
ANPSA-i school fee agütsütsü atema timtemba tsüraburtem dang parnok dangi arutsü shiogo, ta NSF-i metetdaktsü.
June 15, 2020 nü Kohima nung ANPSA den senden ka amendang fee magitsüba indang onük benoka lemsatep.
Senden nungsa NSF-i nija school balala nung inyakba tesayurtem itasen manguba agi timtem ajuruba onük benoka jembi.
Iba senden nung kaketshirtem aser tesayurtem dak sendakba onük aika benoka jembitepa angatettepogo. School tem timi ketdangsüa aotsü atema school fee agütsütetba tsüraburtemia mapang shitak nung fee agütsütsü mepishir, ta NSF-isa metetdaktsü.