Ninang metsürtem atema Chuchuyimlang nung Common Facility Centre ka semzük

Longleng, February 05 (TYO): Mongolbarnü Deputy Secretary & Team Leader, Nagaland Beekeeping & Honey Mission (NBHM), T Imtiwapang Aier-i Chuchuyimlang nung ninang metsürtem atema Common Facility Centre ka semzüktsüogo, ta ketdangsertem osang ka ajanga metetdaktsü.
Iba sentong nung jembidang Deputy Secretary-i, Naga nungeri ninang mochitzü indang aser ninang ajanga tongtibang shilem agiba memeteti tejangraba ka ama ninang metsüa arur, ta ashi.
Paisa, ninang metsüba aser nüngdak balala atema ninang mochitzü adokdaktsüba jenjangji 2007 küm nungang state sorkari angatet, aser ibaji ajanga NBHM tentet, ta metetdaktsü.
Ajioda süaka state-i mangateti alidangyongi ninang metsüba jenjang angateta alisang, Natwar Thakkar lenisüba nung Gandhi Ashram tejakleni oa 1960s mapang nung Chuchuyimlang nung Scientific yimya nung ninang metsüba tesayuba agutsüba atema tenüngsang agutsür, aser scientific inyakyimji tanü tashi benshir, ta pai ashi.
Chuchuyimlang yimdak kiyong ka nungbo kümshia ninang mochitzü seret 800 adokdaktsür aser kiyong ajak senteperbo ton 3-4 adokdaktsür, ta pai ashi.
Team lenirsa, NBHM mission tasenbaji nüngdak apir inyakba lir aser temelung aguja ninang metsürtem nem akokba tashi teyari agutsütsü, ta ashi.
Iba dak sendakba nung pai Chuchiyimlang nung VBKC dang ninang mochitzü jenti adokdaktsütsü aser ibaji ajanga ninang mesüba angazükdak tiyongtsü tesem ka kümdaktsütsü ayongzük.
(Maneni tapak 11 nung…)