Nino Iralu-i Legal Services Clinic Pungro lapoktsü

Dimapur, July 4 (TYO): Nagaland State Legal Services Authority (NSLSA) Member Secretary aser TDP, Vigilance, Mrs. Nino Iralu-i Mongulbarnü Pungro, Kiphire district nung Legal Services Clinic (LCS) lapoktsüogo.
LCS lapokba sülen Kiphire District Legal Services Authority-i yimtsüng lennirtem asoshi workshop ka ayongzüka agi.
India Linük Temzüng Arrla 39A ajanga asenoki NALSA schemes mapa küma inyakteter. Legal Services ya kati ka yariteptsü atema lir aser Legal Services Clinic ajanga Pungro nung alirtem department balala den sendakteptettsü, ta Mrs Nino Iralu-i tanü o jembidang ashi.
Laisa, District Administration-i legal services atema takdang tajung agütsüba atema pelaba metetdaktsü.
Nino Iralu-i National Legal Services Authority scheme 10 indang osang metetdaktsü aser itemji, nisung shibelenba aser tashiyim agi teküp yokdaktsürtem yariba, unorganised sectors nung mapa inyakertem yariba, tanurtem aser parnok kümzüka ayutsü asoshi inyakba, tekolok meshidaker aser matamabensartem yariba, sensak tia agientsü atema inyakba, ozüng alema mozü achirtem yariba aser mozü achiba khuret agientsü asoshi inyakbatem lir.
Laisa, tsüraburtem dang pei chirnurtem meta talangi shisaluyimtsü atema yokba nung kanga kümdangtsü olen ka lemsatep.
Tanurtemi timtem balala ajurur aser ano tiyongtsü nung mapa inyakertemi tsürabur nembo sen mechimenu dang agütsür saka parnokbo aika ajangzüker, ta Nino Iralu-isa shisem.
Sentong nung Chief Judicial Magistrate & Secretary, Kiphire DLSA Mrs. Mezivolu T.Therieh-ia ‘Rules governing the Village Functionaries’ onük jembi.
Head G, Musuthong-i o tatsüka jembidang, Pungro nung alirtem ya international boundary anasa alirtem lir aser yamai meta talangka pilar alirtem dang legal service sayuba ya kanga tongtipang lir, ta ashi.
Paisa, sentong ayonger dang pelaba metetdaktsü aser Legal Services Authority-i parnok yaritsü aser ajungkettsü atema mepishiba ashi.
Sentong nung ADC, Pungro, Wennyei Konyak-i tesentepertem pelaa agizükdang, Nagaland State Legal Services Authority-i Clinic lapokba atema pelaba metetdaktsü.
Iba ya Pungro nung alirtem atema kanga nüngdaka aliba ka lir aser Legal Services Clinic lapokba ajanga nübortem ajangzüktsü, ta Wennyei-isa shisem.